[A:198]las bstan pa'i zhing skyong gdong bzhi pa rnam 'gyur bcu bdun gyi rjes su gnang ba rnams dang / de'i dpe bum nor bu'i do shal dang / snyig thig ha la nag po'i skor tshang ma'i lung dang lag len rnams gsan zhing mthar phyin par mdzad la/ gzhan yang lha 'brang bla ma grub dbang dpal ldan chos rgyal las kyang / 'od dpag med kyi dbang sogs chos 'brel phran tshegs tsam gsan pa yin no zhes thos so/ /yang mdo khams sde dge'i rgyal khab tu lan phyi ma phebs pa'i tshe'ang / sde dge'i dbu bla spangs rtogs nor bu'i mdzod 'chang grub mchog dpal ldan phrin las kyi drung nas/ bya rgyud padma'i rigs kyi gtso bo tshe dpag med lha dgu'i dbang bskur ba sngags kyi bzlas lung dang bcas pa/ kye rdo rje man ngag lugs kyi dbang bskur ba dang / de'i lugs kyi lus dkyil gyi dbang / bdag med lha mo bco lnga'i dbang rnams gsan no/ /sde dge'i dbu bla mkhas dang grub pa'i gtsug rgyan dge 'dun rgya mtsho'i drung nas/ bya rgyud padma'i rigs kyi bdag po 'phags pa bcu gcig zhal lha so bdun gyi dbang dang / gangs can bstan pa'i mnga' bdag rje btsun sa skya pa yab sras rnams las brgyud pa'i man ngag zab mo rnams gtso bor gyur pa'i zab chos 'ga' zhig phyogs gcig tu bsgrigs pa gser pod du grags pa'i skor la/ thog mar bya rgyud de bzhin gshegs pa'i rigs kyi gtso bo klu dbang rgyal po'i sgrub thabs klu sgrub kyis mdzad pa lo chen rin bzang gi 'gyur/ de'i sgrub thabs bcom ldan ral gris mdzad pa/ bstod pa rong ston gyis mdzad pa/ rjes gnang gi tho yig mdzad byang mi gsal ba rnams dang / de bzhin gshegs pa'i rigs kyi bdag po ma ti'i lugs kyi 'jam dkar dpa' bo gcig grub kyi skor la sgrub thabs paNDi ta ma ti'am gsang mtshan sgeg pa'i rdo rjer grags pas mdzad