[A:465]don mthun tshig gis skabs phyes nas/ /dbus gtsang ljongs su gshegs par brtsams/ /de tshe dad pa'i rtsa brtan zhing / /gtong ba'i yal 'dab ring bskyod pa'i/ /dpag bsam shing 'dra'i skye bo yis/ /slar yang mchod cing smon lam btab/ /de nas bye ru'i 'khri shing tshogs/ /rlung gis dal bur bskyod pa'am/ /'on te thub dbang dgra bcom pa'i/ /'khor gyis bskor bzhin mdzes par gshegs/ /chos kyi snang bar rab sbyin pa'i/ /nyin mo'i dpal de gzhan gshegs pas/ /phyogs der mun pas bkab pa bzhin/ /blang dor mig ni zum par gyur/ /rim gyis khyod zhabs padma dkar/ /dbus gtsang ljongs su nyer bkod pas/ /phyogs de'i dga' ston rab 'phel ba/ /nyi mas phyes pa'i padmo bzhin/ /de na mchod dang sbyin pa yi/ /sngon med gter gyi kha phyes pas/ /sngon byon gtong phod can rnams kyi/ /grags pa'ang zil gyis gnon pa bzhin/ /e ma mchod pa'i sprin spro ba'i/ /kun tu bzang de 'di min nam/ /gzhan du mi zad gtong ba'i sgo/ /cig car dbye 'di ga la 'ong / /zab rgyas chos kyis 'gro ba rnams/ /smin grol lam la rab bkod pas/ /snyigs ma lnga bdo'i grags pa yang / /skyengs te sa la thim mam snyam/ /gzod nas thams cad mkhyen pa yi/ /nor bu'i gling du bgrod zin kyang / /da dung thos bsam sgom pa'i grur/ /'jug 'di gzhan la slob phyir nges/ /sku gsung thugs kyi rten rnams kyang / /ye shes sems dpar byin brlabs pas/ /longs sku'i zhing dang ljongs 'di zhes/ /'byed la tshangs pa'ang ngal gyis dogs/ /mdor na rnam dkar phrin las kyi/ /gdugs dkar nyin bzhin bsgreng ba yis/ /grags pa'i ri mo rnam bkra ba/ /phyogs kyi gdong la 'bri ba