[A:482]ma phal che bas sa g.yos kyi 'jigs pa chen po yong bar gsungs kyang / rje 'dis de 'dra'i skyon ci'ang mi 'ong tshul gsungs pa'ang de kho na ltar gyur pa dang / yang rje rang gi zhabs 'bring bar/ nged tshe 'dir rgyu rkyen rten 'brel legs 'grig ma byung ba'i rkyen gyis slob gnyer cher ma shes pa ma gtogs/ mkhas grub sangs rgyas phun tshogs kyi skye mtha' de yin snyam pa sems la shar zhes yang yang bka' stsal 'dug cing / rje sangs rgyas phun tshogs pa ni mgon po 'od dpag tu med pa'i ye shes sgyu 'phrul drwa ba'i rol gar dpal ldan a ti sha'i rnam 'phrul yin par mkhan chen dpal ldan chos skyong gi rnam thar du gsal ba dang / yang 'jam dbyangs mkhyen brtse'i dbang pos ngor dbang khang du rje 'di nyid las lam zab bla ma'i rnal 'byor gyi byin rlabs thog mar gsan pa'i skabs grub chen bi rU pa'i sku'i rnam par gsal bar gzigs pas rkyen byas te/ de phyin rnal 'byor dbang phyug gi sprul pa'i sku rgyal tshab dam pa kun dga' dbang phyug dang dbyer med pa'i thugs nges brtan por 'khrungs par snang bas sku tshe snga ma'i skye brgyud kyang des mtshon par nus pa dang / gzhan yang lo snga ma lcags bya lor bdag cag gi dpal ldan bla ma dam pa nges pa don gyi rdo rje 'chang chen po byams pa kun dga' bstan 'dzin de nyid sku bsnyun pa'i tshul bstan pa'i tshe'ang / rje 'dis da lan gyi snyun gzhi 'di sel mi thub pa 'dra zhes yang yang bka' stsal kyang / bdag cag rnams kyis de tsam gyi skyon cher rang e yong snyam mod/ rjes sor de kho na ltar gyur pa sogs de 'dra'i rigs can shin tu mang zhing / tshul de rnams la gzhig na mngon par shes pa'ang thogs med mnga' bar snang mod/ su zhig gis shes par nus/ grub pa'i mtshan ma ni mdo khams su lan rjes ma phebs pa'i tshe/ gong du bshad pa ltar