[A:483]shin tu sra shing mkhregs pa'i rdo yi ngos su phyag mdzub kyis ma Ni bris pa dang / yang bzhad thub bstan yangs can gyi grwa sa ba rje 'di'i zhal slob yin pa gcig gis kye rdo rje'i gzhi bsnyen byed pa'i tshe bar chad kyi rnam pas nad drag po zhig gis btab par brten/ rje 'di la gsol ba phur tshugs su btab pas snga dro'i dus shig la rje 'di seng ge dkar mo zhig la chibs te phebs byung bas/ khyod kyis nyams len la brtson pa skyed cig /nad las grol bar 'gyur ro zhes bka' stsal byung ba ltar/ de ma thag nas rim gyis nad las grol ba yin ces kho rang gi ngag las thos shing / de lta bu'i grub pa'i mtshan ma rnams ni sngon gyi rgya gar gyi grub thob chen po rnams kyi rnam par thar pa dang khyad par ci'ang mi snang bas/ don la grub pa'i go 'phang mthon por gshegs par gdon mi za ba dang / gzhan yang sku dngos kyis dbang bskur ba dang / byin gyis brlabs pas ni 'gal rkyen bar chad las grol ba lta ci smos/ ljags chab dang / gsang chab tshun chad kyis kyang skye bo mang po nad gdon las grol bar mdzad pa dang / yid dam lha'i sgrub mchod dang / bka' chos 'chad spel sogs gang dang gang stsal kyang sngon khu bo mkhan chen rdo rje 'chang chen po de nyid kyi gsung rgyun dang phyag len ji ltar stsal ba de kho na ltar las sla chos su gtan nas ma song bar mdzad cing / gzhan dag la'ang de ltar dgos pa'i dgag sgrub kyi bca' ba dam po mdzad pa dang / ris su med pa'i grub mtha' thams cad la dag snang phyogs med du mdzad pa las/ skye bo ngan pa gzhan gyi spyod tshul lta bu'i chags sdang rigs lta ci/ chos par rlom pa dang skyes bu dam par grags pa kha cig kyang rang gzhan gyi grub mtha'i phyogs bzung nas gzhan la zur gyis smod pas chos la