[A:389]mo 'di sku khams dwangs min yod par ma zad/ rmi ltas kyang 'khrugs pa zhig 'dug pas/ bla ma rnams su thugs brtag dang mo rtsis zhib par byas te rim gro gang zab bsgrubs na legs tshul gsungs pa bzhin sku tshab pas de bzhin bgyis kyang / sems can rang rang gi las kyi bsgo skal chu bo'i rgyun dang 'dra ba bzlog tu med pas thams cad kyis sku gegs ci yang med tshul bshad rung / zla ba de'i nang du sras mo tshe dbang dpal mo dus kyi chos nyid du gyur/ rje 'dis lhun grub steng du phebs nas drug 'du'i dbu bzhugs rnams mdzad/ de rjes lha sras rin po che rnams kyi sku'i rkyen sel sgrub par phur pa bla ma chos kyi rgyal mtshan pa bsko bzhag stsal/ rje 'di dgung grangs so gcig pa sa yos hor zla gnyis pa'i yar tshes nas brtsams te/ stobs kyi 'khor los sgyur ba sde dge chos rgyal chen pos gsol ba btab pa'i ngor/ khu bo mkhan chen rdo rje 'chang chen pos gsung ngag rin po che lam 'bras slob bshad kyi chos 'khor bskor ba rnams rje 'dis kyang gsan par mdzad de/ de'ang lam gyi sngon 'gro snang ba gsum gyi khrid sngon du 'gro ba'i brgyud pa'i khyad par gnyis ldan gyi cho ga'i sgo nas byang chub mchog tu sems bskyed pa dang / de nas slob ma rjes su 'dzin pa sogs dbang gi mngon par rtogs pa brgyad dang ldan pa'i sgo nas dpal kye rdo rje'i rdul tshon gyi dkyil 'khor du dbang bskur ba aShta'i bzlas lung dang bcas pa dang / lam gyi dngos gzhi rgyud gsum yongs su rdzogs pa'i nyams khrid shin tu zhib pa/ de dag gi nang gses phyi bskyed rim gyi mgor bdag med lha mo bco lnga'i dbang dang / nang bskyed rim gyi mgor slob dpon gyi zab mo lus kyi dkyil 'khor du dbang bskur ba yig brgya'i bzlas lung dang bcas pa/ rdzogs rim gyi mgor