[A:629]lam zab bla ma'i rnal 'byor/ dpal kye rdo rje phyi nang sbrags ma'i mngon rtogs lam dus kyi dbang blang ba dang bcas shin tu rgyas pa/ rnal 'byor dbang phyug gi srung ba/ nA ro mkha' spyod kyi sgom bzlas bcas sa skya'i chag med rnam bzhir grags pa rnams dang / gzhan yang 'jam dbyangs dkar po/ dbyangs can ma dkar dmar/ 'byung po 'dul byed/ mgon dkar/ rdo rje brag rdzong ma rnams kyi mngon rtogs bzlas pa dang bcas pa/ gtor ma brgya rtsa sogs gtor ma'i skor dang / kye rdor mkha' spyod sogs yi dam rnams dang / gur zhal mgon dkar sogs chos skyong nor lha bcas kyi gtor bsngo shin tu mang ba bcas ma chag par mdzad cing / de lta bu'i mnyam gzhag gi gnas skabs kun tu snang ba'i dngos po thams cad zab bsal gnyis su med pa'i lha dang gzhal yas khang gi rnam par shar zhing de nyid kyang bde stong zung du 'brel ba'i ye shes kyi ngo bor nyams su myong bas 'od gsal phyag rgya chen po'i rnam rol du gzigs pa yin la/ rjes spyod lam gyi gnas skabs su'ang / rgyud las/ bza' dang btung dang blug pa dang / /nyal dang log dang sems pa na/ /phyag rgya chen po mngon 'dod pa/ /de nas mngon du 'gro bar 'gyur/ /zhes gsungs pa ltar dbang dang rim gnyis las byung ba'i rang byung gi ye shes de nyid las nam yang g.yo ba med par nyin mtshan khor yug tu 'das pas yul can gyi gnod pas skad cig kyang brdzi ba'i go skabs med pa slar la ting nge 'dzin gyi stobs lhag par 'bar ba'i grogs 'ba' zhig tu gyur pa yin no/ /de ltar snang srid thams cad chos nyid phyag rgya chen po'i yo lang du gzigs pa'i dbang gis bsams na shes pa'i mngon shes la sogs pa bdag cag rnams kyis cung zad mthong thos su gyur pa'ang / sngar dgung grangs