[A:628]'dogs bcad pa'i don rnams sgom pas nyams su ma blangs na don med du 'gyur ba ni/ sangs rgyas phal po che las/ yang dag sangs rgyas bstan pa ni/ /thos pa tsam gyis mi 'grub bo/ /dper na la la chu klung gis/ /stobs med nan gyis khyer ba na/ /skom nas shi bar gyur pa ltar/ /ma bsgoms chos kyang de bzhin no/ /zhes gsungs pa ltar ro/ /de lta bu'i lam de gzhan la'ang bstan par bzhed de/ snga phyir yi dam gyi lha rnams kyi bsnyen sgrub kyi rim pa ji ltar mdzad pa'ang / dgung grangs bco lnga skor tsam la kun rig gi bsnyen chen rgyas pa zhig bzhugs te ma grol bar gsung bcad shin tu dam par mdzad pa dang / dgung grangs bcu bdun pa'i nang 'jam dbyangs dkar po dang / dbyangs can ma dkar dmar/ seng gdong ma sogs kyi bsnyen sgrub tshul bzhin mdzad pa dang / dgung grangs nyer gcig pa sa mo bya'i lo hor zla bzhi pa'i mjug nas bzung dpal kye rdo rje'i gzhi'i bsnyen pa bcu cha'i sbyin sreg dang bcas pa zla ba bcu gcig gi khongs su grub par mdzad/ yang dgung grangs nyer bdun pa'i nang tsam gdan sa'i zhal 'dzin skyong skabs mgon po brag rdzong ma dang / grub rgyal lugs kyi tshe sgrub/ sgrol ma dkar mo sogs kyi bsnyen mtshams zla ba kha shas bar bzhugs/ zhal 'dzin grol mtshams o rgyan mchog gyur gling pa'i gter byon thugs sgrub bar chad kun sel gyi grangs bsnyen tshul bzhin rdzogs par mdzad pa dang / yang me stag lor dpal kye rdo rje'i gzhi'i bsnyen pa shin tu rgyas pa sbyin sreg dang bcas pa lo gcig lhag tsam gyi bar la yongs su rdzogs par mdzad pa sogs snga phyir bsnyen sgrub kyi rim pa dpag tu med pa zhig mdzad la/ der ma zad rgyun gyi thugs dam nyams bzhes mdzad pa la'ang