[A:634]mong ma yin pa skyes so zhes mkhan chen rdo rje 'chang dpal ldan blo gros rgyal mtshan nyid kyis bdag la bka' stsal to/ /yang lcags bya lo'i nang skor sde dge'i phyogs su nyag rong gi 'ur zings che skabs/ rje 'di'i drung du khang sar mkhan rin po che ngag dbang bsod nams rgyal mtshan dang / bla ma bstan pa dar rgyas gnyis bzhugs yod par khams phyogs kyi bde dogs sogs gsung 'phros 'ga' zhig mdzad skabs/ khang sar mkhan chen nas sde dge chos rgyal mchog gi bstan srid la nyes skyon yod med/ slar ci 'gyur sogs zhus pas/ rje 'dis zhal 'dzum tsam mdzad nas sde dge'i phyogs rnams khyed rang nas gzigs 'ong gsungs pa dang / yang a cang sku rtsed zhu ba ma gtogs nyes skyon rang cher mi 'ong ba 'dra zhes gsungs pa bzhin/ phyis su khang sar mkhan nyid sde dger pheb rgyu dang / sde dge'i chab srid kyang nyes skyon med par mthar gong 'phel du gyur pa sogs ma 'ongs pa dngos su gzigs pa'i tshul 'di dag rjes sor khams phyogs su'ang bla ma bstan pa dang yang gsung 'phros byung zhing / sde dge'i phyogs khyed rang nas gzigs 'ong gsungs pa'i shugs kyis rje rin po che nyid khams phyogs su pheb mi grub pa'i dgongs pa'ang gsal bar bstan par nges so zhes mkhan rin po che ngag dbang bsod nams rgyal mtshan dngos kyi zhal las bdag gis thos pa'o/ /de dag gis mtshon te rmad du byung ba'i rnam par thar pa mtha' yas pa zhig mnga' bar snang mod/ thugs shin tu sgam zhing gzi brjid che ba dang / don dang ldan nges cung zad tsam ma gtogs gsung 'phros sna tshogs pa mdzad pa'i go skabs med pa'i dbang gis zhabs 'bring ba dag gis kyang cher zhu bar mi nus pas 'di tsam ma gtogs sgro skur gyi mthar 'gyur dogs