[A:636]pa'i 'jo sgeg gis/ /phyogs kyi mdzes ma kun gyi yid sdud cing / /mgrin pa mdzes pa'i skal bzang ci yang sgrub/ /srid pa'i dri ma rab btang bsam gtan gyis/ /g.yo med bdud rtsi'i rgya mtsho la brten nas/ /mtha' klas yon tan grub pa'i 'dod khams la/ /chags bral lha yis kyang ni yongs mi shes/ /gting dang pha rol med pa'i yon tan mtha'/ /ji bzhin brjod pa'i ro 'dzin gang zhig mchis/ /de lta mod kyi cung zad gang smra ba/ /yon tan bsam mi khyab tsam mtshon phyir ro/ /zhes khams gsum chos kyi rgyal po mkhan chen rdo rje 'chang byams pa kun dga' bstan pa'i rgyal mtshan dpal bzang po'i rnam par thar pa yon tan mtha' yas pa'i rgya mtsho dngos grub kyi rba rlabs rnam par g.yo ba las/ bshad sgrub gnyis kyi sgo nas bstan pa rin po che phyogs thams cad du spel ba'i tshul 'ga' zhig brjod pa las 'phros te gsang ba thun mong ma yin pa'i rnam par thar pa cung zad tsam smos pa'i skabs te drug pa'o// // ! de ltar na bdag cag gi bla ma yon tan ma lus pa'i phung por gyur pa 'dis sku tshe rangs par bshad sgrub gnyis kyi sgo nas rgyal ba'i bstan pa rin po che phyogs thams cad du spel ba la brten nas gsung las skyes pa'i bstan 'dzin gyi slob ma'ang / stod mnga' ri la dwags kyi yul nas smad rgya nag chen po'i mthar thug pa'i bar du gnas pa'i gdul bya skal ba dang ldan pa nam mkha' dwangs pa'i skar tshogs lta bu bgrang du med pa zhig 'dus pas de dag re re nas brjod par ji ltar nus te/ 'on kyang khyad par du 'phags pa'i yon tan du ma dang ldan pa'i phyir thugs sras rnams kyi nang nas gtso bor gyur pa dag rang gi blo yul du ji tsam