[A:༦༣༦]པའི་འཇོ་སྒེག་གིས། །ཕྱོགས་ཀྱི་མཛེས་མ་ཀུན་གྱི་ཡིད་སྡུད་ཅིང༌། །མགྲིན་པ་མཛེས་པའི་སྐལ་བཟང་ཅི་ཡང་སྒྲུབ། །སྲིད་པའི་དྲི་མ་རབ་བཏང་བསམ་གཏན་གྱིས། །གཡོ་མེད་བདུད་རྩིའི་རྒྱ་མཚོ་ལ་བརྟེན་ནས། །མཐའ་ཀླས་ཡོན་ཏན་གྲུབ་པའི་འདོད་ཁམས་ལ། །ཆགས་བྲལ་ལྷ་ཡིས་ཀྱང་ནི་ཡོངས་མི་ཤེས། །གཏིང་དང་ཕ་རོལ་མེད་པའི་ཡོན་ཏན་མཐའ། །ཇི་བཞིན་བརྗོད་པའི་རོ་འཛིན་གང་ཞིག་མཆིས། །དེ་ལྟ་མོད་ཀྱི་ཅུང་ཟད་གང་སྨྲ་བ། །ཡོན་ཏན་བསམ་མི་ཁྱབ་ཙམ་མཚོན་ཕྱིར་རོ། །ཞེས་ཁམས་གསུམ་ཆོས་ཀྱི་རྒྱལ་པོ་མཁན་ཆེན་རྡོ་རྗེ་འཆང་བྱམས་པ་ཀུན་དགའ་བསྟན་པའི་རྒྱལ་མཚན་དཔལ་བཟང་པོའི་རྣམ་པར་ཐར་པ་ཡོན་ཏན་མཐའ་ཡས་པའི་རྒྱ་མཚོ་དངོས་གྲུབ་ཀྱི་རྦ་རླབས་རྣམ་པར་གཡོ་བ་ལས། བཤད་སྒྲུབ་གཉིས་ཀྱི་སྒོ་ནས་བསྟན་པ་རིན་པོ་ཆེ་ཕྱོགས་ཐམས་ཅད་དུ་སྤེལ་བའི་ཚུལ་འགའ་ཞིག་བརྗོད་པ་ལས་འཕྲོས་ཏེ་གསང་བ་ཐུན་མོང་མ་ཡིན་པའི་རྣམ་པར་ཐར་པ་ཅུང་ཟད་ཙམ་སྨོས་པའི་སྐབས་ཏེ་དྲུག་པའོ།། །། ༈ དེ་ལྟར་ན་བདག་ཅག་གི་བླ་མ་ཡོན་ཏན་མ་ལུས་པའི་ཕུང་པོར་གྱུར་པ་འདིས་སྐུ་ཚེ་རངས་པར་བཤད་སྒྲུབ་གཉིས་ཀྱི་སྒོ་ནས་རྒྱལ་བའི་བསྟན་པ་རིན་པོ་ཆེ་ཕྱོགས་ཐམས་ཅད་དུ་སྤེལ་བ་ལ་བརྟེན་ནས་གསུང་ལས་སྐྱེས་པའི་བསྟན་འཛིན་གྱི་སློབ་མའང༌། སྟོད་མངའ་རི་ལ་དྭགས་ཀྱི་ཡུལ་ནས་སྨད་རྒྱ་ནག་ཆེན་པོའི་མཐར་ཐུག་པའི་བར་དུ་གནས་པའི་གདུལ་བྱ་སྐལ་བ་དང་ལྡན་པ་ནམ་མཁའ་དྭངས་པའི་སྐར་ཚོགས་ལྟ་བུ་བགྲང་དུ་མེད་པ་ཞིག་འདུས་པས་དེ་དག་རེ་རེ་ནས་བརྗོད་པར་ཇི་ལྟར་ནུས་ཏེ། འོན་ཀྱང་ཁྱད་པར་དུ་འཕགས་པའི་ཡོན་ཏན་དུ་མ་དང་ལྡན་པའི་ཕྱིར་ཐུགས་སྲས་རྣམས་ཀྱི་ནང་ནས་གཙོ་བོར་གྱུར་པ་དག་རང་གི་བློ་ཡུལ་དུ་ཇི་ཙམ་