[A:661]phyogs tha dad na 'khod pa'i skye 'gro rnams kyis kyang sngon chad gang du'ang mthong thos su ma gyur pa'i ngo mtshar mig gi bdud rtsi 'di lta bu/ 'jig rten gyi khams su skyes bu dam pa zhig gsar du 'khrung pa'am/ yang na zhing khams gzhan du gshegs pa'i ltas 'dra yin nam/ zhes thams cad the tshom du gyur pas gcig la gcig yang nas yang du gleng bar byed do zhes grags la/ khyad par dgung zhag yongs su rdzogs pa grub pa'i rjes thog sngar bshad pa ltar khams phyogs nas khang gsar mkhan rin po che khrom khog tu gdul byar pheb pa tshur byon nas 'dzin rnam rgyal mgon khang du bzhugs yod skabs zla ba bcu gcig pa'i tshes brgyad kyi nub mnal lam du nub phyogs nas sprin dkar po dar yug brkyangs pa lta bu zhig gi sna la rje rdo rje 'chang de nyid chos gos la sogs pa'i na bza' rnams dus rgyun gyi rnam pa ji lta ba la/ dbu zhwa sa zhu rnying song zhig bzhes/ phyag g.yas kyis rdo rje dang / g.yon pas dril bu gsil zhing smin mtshams kyi thad kyi nam mkhar pheb byung ba dang / shin tu dgyes pa chen pos byin rlabs shig zhu snyam pa'i ngang nas rje de nyid zhal 'dzum pa dang bcas da ni nged 'gro ba yin/ khyed rang nas dam tshig la bsrung sdom dang / bstan pa la phan blo ma zhan cig gsungs byung ba/ de ma thag na bza'i mthar bzung bar brtsams pas phyag brkyangs kyang je mtho je mthor song nas ma zin pa'i dbang gis bshum bzhin 'bod pa'i nyams shar ba/ de'i rkyen gyis sku mdun du phyag mdzod shes blo gzims yod pa'ang glo bur duu sad nas bsnyung ba min nam/ de 'dra bshum zhing 'bod pa ci yin zer byung zhes mkhan rin po che ngag dbang bsod nams rgyal mtshan nyid kyis bdag la phyag