[A:672]ba ga la mnga'/ /zhes dang / mngon rtogs rgyan las/ gang gis srid pa ji srid bar/ /'gro la phan pa sna tshogs dag /mnyam du mdzad pa'i sku de ni/ /thub pa'i sprul sku rgyun mi 'chad/ /ces dang / rgyud bla ma las/ gang zhig gang gis 'dul ba yi/ /bya ba gang du gang gi tshe/ /de yi rnam rtog skye med phyir/ /thub pa rtag tu lhun gyis grub/ /ces gsungs pa ltar ro/ /de nyid kyi phyir rje rdo rje 'chang de nyid dgongs pa chos dbyings su thim pa'i tshul bstan nas zla ba lnga tsam gyi skabs nub gcig mkhan chen rdo rje 'chang dpal ldan blo gros rgyal mtshan gyi mnal lam du zhwa lung grong pa'i nang yin snyam pa'i khang pa zhig gi thog khar/ thams cad kyis mkhan chen bde bar gshegs pa de nyid kyi sprul pa'o zhes gleng bar ras phyar lta bu zhig gi nang khye'u chung dkar po/ dmar po/ sngon po gsum nges par gzigs la/ gzhan gyi kha dog sogs zhib par ma nges kyang lnga tsam zhig 'dug snyam pa'i ngang nas/ dmar po de mkhan chen nyid kyi mdun du tshur byon pa'i snang ba byung zhes bka' stsal pa/ de'i don bdag ni rmongs pa chen po'i dbang du song bas ji bzhin shes pa ga la srid/ 'on kyang rang gi bsam tshod la/ ji skad du/ dpal kye rdo rje'i rtsa ba'i rgyud kyi brtag pa gnyis pa las/ rigs ni rnam pa drug brjod cing / /mdor bsdus pas ni rnam pa lnga/ /sku gsung thugs kyi dbye ba yis/ /phyi nas rnam pa gsum du 'gyur/ /zhes gsungs pa dang / brtag pa phyi ma'i bzhi par yang / mi bskyod rnam snang rin chen 'byung / /dpag med phrag dog rdo rje sems/ /zhe sdang gti mug ser sna dang / /'dod chags phrag dog bde ba dag /'dis ni rim pas bsgom pa nyid/ /rdo rje sems