[A:553]lags/ /dgongs pa dag pa 'ba' zhig gis/ /khyod kyi tshul khrims goms par mdzad/ /ces gsungs pa ltar blo dang ldan pa gang zhig rnam par thams cad mkhyen pa'i grong khyer du 'jug par 'dod pa dag la thog ma nyid du med du mi rung ba'i gzhi chen po ni lhag pa tshul khrims kyi bslab pa rin po che nyid yin no zhes bstan pa'i sgo nas rnam par dag pa'i lam gyi rim pa 'di nyid kho na la dgod par bzhed de/ rmad du byung ba'i thabs mkhas dang thugs rje chen po'i mdzad pa bla na med pas rnam par 'phrul pa'i tshul 'di lta bu bstan par mdzad pa yin no/ /zhes shes par bya'o/ /'dod pa'i yon tan mi zad dug gis ni/ /skye rgu 'di dag ji ltar brlags gzigs nas/ /khyed kyi khyim nas byung ba'i thabs mkhas 'dis/ /'gro la thar pa'i sgo glegs dang po phyes/ /thugs la snying rje'i rgyan ldan gzhon nu des/ /rnam gsum ngur smrig gos bzang 'dzin tsam nas/ /grags pa'i rgyal mtshan stong gis 'jig rten 'dir/ /mdzes pa thob pa'i rnam 'phrul ci yang byung / /yon tan dkyil 'khor rdzogs pa'i zla ba des/ /byangachub thugs bskyed bzhes tshe rgyal ba rnams/ /dgyes ldan bdud rtsis bran pa'i thugs kyis ni/ /sa gsum 'gro 'di mgon dang bcas par dgongs/ /rigs can gsum gyi ji snyed bslab pa kun/ /gsang chen sdom pa'i gser du bsgyur ba yi/ /rnam 'phrul zab mo gang gis sa steng 'di/ /rig pa 'dzin pa'i grong khyer mchog tu bsgyur/ /snying stobs bdud rtsi'i rgya mtsho de yi bzhin/ /blta bar ma bzod sdom pa'i mi mthun phyogs/ /phrag dog rlung gis srid pa'i mtha' las kyang / /ring po'i lam du yud kyis song ba bzhin/ /zhes khams