[A:554]gsum chos kyi rgyal po mkhan chen rdo rje 'chang byams pa kun dga' bstan pa'i rgyal mtshan dpal bzang po'i rnam par thar pa yon tan mtha' yas pa'i rgya mtsho dngos grub kyi rba rlabs rnam par g.yo ba las/ sdom pa gsum gyi bdud rtsi gsol ba'i skabs te gnyis pa'o// // ! de ltar sdom pa gsum gyi bdud rtsis thugs rgyud yongs su gtams nas 'di snyam du dgongs te/ sangs rgyas kyi bstan pa la zhugs pa yongs su rdzogs pa rnams kyi las su bya ba ni klog pa thos bsam dang / sgrub pa bsam gtan gyi rim pa la rtse gcig tu brtson pa'i sgo nas lung sde snod gsum dang / mngon rtogs bslab pa gsum gyis rgyud phyug par byed pa nyid yin la/ de'ang 'khor ba'i rtsa ba ma rig pa'i mun pa drung nas 'byin pa la gnyen po bdag med rtogs pa'i shes rab khyad par can bskyed dgos shing / de'i rgyu'ang thos pa las 'bad pa nyid yin te/ mgon po byams pas/ shes rab las gzhan de dag ni/ /spong rgyu gzhan med de yi phyir/ /shes rab mchog yin de'i gzhi ni/ /thos pa de phyir thos pa mchog /ces dang / skyes rabs las kyang / thos pa gti mug mun sel sgron me yin/ /rkun po la sogs mi 'khyer nor gyi mchog /kun tu rmongs pa'i dgra 'joms mtshon cha yin/ /thabs tshul man ngag ston pas grogs kyi mchog /phongs par gyur kyang mi 'gyur mdza' bo yin/ /gnod pa med pas mya ngan nad kyi sman/ /nyes pa chen po yi ni dug 'joms pa/ /grags dang dpal dang gter gyi mchog kyang yin/ /zhes sogs bka' dang bstan bcos rnams nas lan cig ma yin par yang nas yang du gsungs pa ltar ro/ /de bas na thog ma nyid du 'bad par bya ba ni thos pa kho na yin pas bdag gis kyang je dang por rang nyid thos pa la 'jug