[A:555]pa'i thabs kyi rim pas skyes bu blo gros dang ldan pa dag thar pa'i them skas mchog la rim gyis 'dzegs pa'i thabs tshul zab mo 'di lta bu la dgod par bya'o snyam du dgongs te/ thog mar gong du bshad pa ltar yongs rdzogs dge bsnyen gyi sdom pa bzhes ma thag yi ge'i phyi mo nas brtsams te rgyud chung bzhi yongs su rdzogs pa thugs la bzung ba'i bar dang / de nas dgung lo bcu gnyis pa'i skabs tshigs snga ma dge tshul gyi sdom pa gsan pa'i rjes su mkhan chen rdo rje 'chang mched zhal gyi dgongs pa ltar khra le ba chos rje dge legs rgya mtsho slob dpon du bzhes te ngor chen dkon mchog lhun grub kyis mdzad pa'i snang gsum rgyud gsum thugs la bzung zhing bla brang du rgyug 'bul bar mdzad/ lhag par dgung grangs bcu gnyis pa dang bco lnga son pa'i skabs sogs su/ khams gsum 'khor ba 'di ni gang du skyes kyang sdug bsngal gyi rang bzhin las ma 'das par 'dug /da lta'i gnas lus longs spyod phun sum tshogs pa 'di rnams kyang mi rtag cing mi brtan la sgyu ma'am smig rgyu'i tshogs dang mtshungs par byis pa 'brid pa'i chos nyid can du zad la/ snyigs ma'i dus kyi skye bo ngan pa rnams kyi ngo srung ji ltar bgyis kyang mgu ba'i dus med par slar log sgrub 'ba' zhig ste/ rgyal ba'i sras po zhi ba lhas/ skad cig gcig gis mdza' gyur la/ /yud tsam gyis ni dgrar yang 'gyur/ /dga' ba'i gnas la khro byed pas/ /so so'i skye bo mgu bar dka'/ /zhes dang / des kyang bdag don ma byas la/ /bdag kyang de don mi 'gyur bas/ /byis las thag ring byol bar bya/ /zhes sogs mtha' yas pa gsungs so/ /des na 'jig rten 'dir snang gi g.yeng ba thams cad dug can gyi zas ltar rgyang ring du spangs te/