[A:560]rje'i gzhi'i bsnyen pa bcu cha'i sbyin sreg dang bcas pa mthar phyin par mdzad pa yin zhing / lo de'i mjug nas bzung dgung grangs nyer gnyis pa dang nyer gsum pa'i nang klu dang sa bdag gi gnod pa lta bus zhabs la bsnyung gzhi shin tu yun ring ba zhig gis thebs pa'i tshul bstan mod/ bdag cag gi 'dren pa dam pa 'di ni bskal pa dpag tu med pa nas 'khor 'das bde sdug bzang ngan la sogs pa thams cad chos dbyings mnyam pa nyid du gzigs pa nyid goms pa rab kyi mthar phyin pa'i dbang gis gnod pa la ji mi snyam pa'i bzod pa chen po dang 'brel par brtson 'grus kyi stobs lhag par 'bar bas mkhan chen rdo rje 'chang mched zhal sogs chos grwa 'di nyid na bzhugs pa'i bla ma rnams las bka' chos gsan pa dang / dpa' zhwa lu ri sbug tu mchog sprul rdo rje 'chang blo gsal bstan skyong gi drung du bsnyen te dus kyi 'khor lo'i dbang dang sbyor drug gi bka' khrid gsan pa dang / mkhan chen rdo rje 'chang rnal 'byor 'jam dpal bzang po dang lhan cig 'jad chab tshan du pheb ste gangs can dang / khro phu/ bo dong la sogs pa'i dgon khag bcu skor tsam gyi rten gsum rnams la mchod 'bul dang / 'dus pa rgya mtshor mang ja 'gyed dang bcas pa zab rgyas su mdzad pa sogs dge ba'i bya ba la lhag par brtson par mdzad pas rim gyis bar chad kyi g.yul las rnam par rgyal ba'i rgyal mtshan phyogs kyi tha gru kun tu khyab pa'i gzi byin gyis bskal pa'i mthar thug par byon pa'i slob ma nying slob dang bcas pa rnams la'ang mi mthun pa'i nyer 'tshe phra mo tsam gyis kyang reg par mi nus par byin gyis brlabs so/ /de ltar rje btsun bla ma rnams kyi drung nas snga phyir chos gsan pa'i