[A:528] las dang nyon mongs pa'i 'ching ba kun ldan gyi so so'i skye bo bdag lta bu'i rang stobs kyis bsnyad par mi nus mod kyi/ tshul 'di ni bde bar gshegs pa'i bka' lung dri ma med pa dag las lan cig ma yin par yang nas yang du gsungs pa dag ni shin tu mngon te/ de'ang dpal gsang ba 'dus pa las/ bcom ldan 'das de bzhin gshegs pa thams cad kyi sku dang / gsung dang / thugs rdo rje gsang ba 'dus pa mngon par dbang bskur ba'i slob dpon la de bzhin gshegs pa thams cad dang / byang chub sems dpa' thams cad kyis ji ltar blta bar bgyi/ rigs kyi bu de bzhin gshegs pa thams cad dang / byang chub sems dpa' rnams kyis byang chub kyi rdo rje bzhin du blta bar bya'o/ /de ci'i phyir zhe na/ slob dpon ni byang chub kyi sems dang mnyam zhing rnam pa gnyis su dbyer med do/ /rigs kyi bu mdor bstan na phyogs bcu'i 'jig rten gyi khams na sangs rgyas dang byang chub sems dpa' ji snyed 'khod cing 'tsho la skyong ba de dag thams cad dus gsum du byon nas/ slob dpon la de bzhin gshegs pa thams cad kyis mchod pas yang dag par mchod nas/ sangs rgyas kyi zhing der yang 'gro zhing ngag rdo rje'i yi ge'ang 'di skad du 'byin to/ /bdag cag de bzhin gshegs pa thams cad kyi pha'o/ /bdag cag de bzhin gshegs pa thams cad kyi ma'o zhes bya ba nas/ bdag cag de bzhin gshegs pa thams cad kyi ston pa'o zhes bya ba'i bar