[A:586]med pas 'khor ba'i skye gnas rnams su 'khor ba na yun ring po zhig nas rang rang gi dge ba'i bshes gnyen du gyur pa gang yin pa des 'dul ba ni ches sla'i/ de las gzhan du na/ lha yi rgyal pos char phab kyang / /sa bon mi rung mi 'khrungs ltar/ /sangs rgyas rnams ni byung gyur kyang / /skal pa med pas bzang mi myong / /zhes gsungs pa ltar skal pa dang mi ldan na yon tan gyi khyad par bsam gyis mi khyab pa mnga' ba'i 'dren pa dam pa dag gis phrin las ji tsam mdzad du zin kyang 'dul bar nus pa ma yin te/ ma skyes dgra'i 'gyod pa bsal ba'i mdo las/ bcom ldan 'das kyis bka' stsal pa/ shA ri'i bu 'jam dpal gzhon nur gyur pa 'dis rgyal po ma skyes dgra 'di bskal pa dri ma med pa zhes bya ba na bcom ldan 'das de bzhin gshegs pa phyag bzang zhes bya ba'i gsung rab las bla na med pa yang dag par rdzogs pa'i byang chub tu sems bskyed du bcug go /shA ri'i bu rgyal po ma skyes dgra 'di ni 'jam dpal gzhon nur gyur pa ma gtogs par sangs rgyas stong gis chos bshad kyang 'gyod pa de bsal bar bya ba'i gnas dang go skabs med do/ /de ci'i phyir zhe na/ 'di nyid kyis 'dul ba yin te/ phyi phyir zhing 'dis chos zab mo bstan pa 'di nyid las thos par 'gyur ro/ /de bas na shA ri'i bu rnam grangs des kyang 'di ltar rig par bya ste/ gang dang gang dag byang chub sems dpa' gang dang gang dag gis 'dul bar 'gyur ba de dang de nyid kyis chos bstan pa shes par 'gyur ro/ /zhes gsungs pa ltar ro/ /des na rgyal ba rnams ni shes bya thams cad la chags thogs med pa'i spyan dang ldan pas mi mkhyen pa'am/ mi gzigs pa ci 'ang mi mnga' bas/ re zhig sngon gyi las smon gyis 'phen pa'i dbang gis gdul bya 'di