[A:587]dag ni rje rin po che 'di nyid kho nas 'dul ba'i dus la bab kyi/ gzhan gang gis kyang gdul bar bya ba'i gnas dang go skabs med do zhes ye shes gzigs pa'i me long du thugs kyi dgongs par de lta bu shar bar mngon no/ /de la bdag cag gi 'dren pa dam pa 'dis rje rgyal ba gnyis pa'i chos kyi khri la zhabs kyi padmo bkod pa re zhig zhal gyis bzhes dka' ba ltar bstan pa'ang / spyir sangs rgyas rnams ni 'jig rten gyi khams na su ni dar/ su ni rgud/ su ni 'dul ba'i dus la bab ces nyin mtshan dus drug tu gzigs pa dus las yol ba mi mnga' bas gzhan dag gis ched du bskul ba sogs la ltos pa med kyang / rgyal ba rnams ni gang la gang 'dul gyi mdzad pa 'ba' zhig ston pa yin pas/ 'jig rten pa dag rgyal po dang blon po la sogs pa che zhing mtho ba rnams dang / kun gyi tshad mar gyur pa'i gang zag dag gis gsol ba 'debs pa sogs shin tu che zhing gnyen pa'i spyod pa dag la yid ches shing ngo mtshar du bzung nas de 'dra'i rjes su zhugs par sems pa yin la/ des na bdag cag gi ston pas kyang bla na med pa'i ye shes kyi bdud rtsi brnyes nas zhag bdun phrag bdun gyi bar du chos mi gsung par/ 'jig rten kun la snying brtse mtha' yas pas/ /gzhan gyis gsol ba btab la nga mi ston/ /skye bo de dag tshangs la dad pa ste/ /de yis gsol ba btab na 'khor lo bskor/ /zhes gsungs te thugs las chung ngu'i tshul du bzhugs pa dang / stong gsum gyi bdag po tshangs pa gtsug phud can tshangs pa 'bum phrag drug cu rtsa brgyad brgya byin dang bcas pas gser gyi 'khor lo dang chos kyi dung la sogs pa phul te nan tan chen pos yang nas yang du gsol ba btab pa la brten nas gzod zhal gyis bzhes pa ltar/ 'dir yang sems