[A:༥༨༧]དག་ནི་རྗེ་རིན་པོ་ཆེ་འདི་ཉིད་ཁོ་ནས་འདུལ་བའི་དུས་ལ་བབ་ཀྱི། གཞན་གང་གིས་ཀྱང་གདུལ་བར་བྱ་བའི་གནས་དང་གོ་སྐབས་མེད་དོ་ཞེས་ཡེ་ཤེས་གཟིགས་པའི་མེ་ལོང་དུ་ཐུགས་ཀྱི་དགོངས་པར་དེ་ལྟ་བུ་ཤར་བར་མངོན་ནོ། །དེ་ལ་བདག་ཅག་གི་འདྲེན་པ་དམ་པ་འདིས་རྗེ་རྒྱལ་བ་གཉིས་པའི་ཆོས་ཀྱི་ཁྲི་ལ་ཞབས་ཀྱི་པདྨོ་བཀོད་པ་རེ་ཞིག་ཞལ་གྱིས་བཞེས་དཀའ་བ་ལྟར་བསྟན་པའང༌། སྤྱིར་སངས་རྒྱས་རྣམས་ནི་འཇིག་རྟེན་གྱི་ཁམས་ན་སུ་ནི་དར། སུ་ནི་རྒུད། སུ་ནི་འདུལ་བའི་དུས་ལ་བབ་ཅེས་ཉིན་མཚན་དུས་དྲུག་ཏུ་གཟིགས་པ་དུས་ལས་ཡོལ་བ་མི་མངའ་བས་གཞན་དག་གིས་ཆེད་དུ་བསྐུལ་བ་སོགས་ལ་ལྟོས་པ་མེད་ཀྱང༌། རྒྱལ་བ་རྣམས་ནི་གང་ལ་གང་འདུལ་གྱི་མཛད་པ་འབའ་ཞིག་སྟོན་པ་ཡིན་པས། འཇིག་རྟེན་པ་དག་རྒྱལ་པོ་དང་བློན་པོ་ལ་སོགས་པ་ཆེ་ཞིང་མཐོ་བ་རྣམས་དང༌། ཀུན་གྱི་ཚད་མར་གྱུར་པའི་གང་ཟག་དག་གིས་གསོལ་བ་འདེབས་པ་སོགས་ཤིན་ཏུ་ཆེ་ཞིང་གཉེན་པའི་སྤྱོད་པ་དག་ལ་ཡིད་ཆེས་ཤིང་ངོ་མཚར་དུ་བཟུང་ནས་དེ་འདྲའི་རྗེས་སུ་ཞུགས་པར་སེམས་པ་ཡིན་ལ། དེས་ན་བདག་ཅག་གི་སྟོན་པས་ཀྱང་བླ་ན་མེད་པའི་ཡེ་ཤེས་ཀྱི་བདུད་རྩི་བརྙེས་ནས་ཞག་བདུན་ཕྲག་བདུན་གྱི་བར་དུ་ཆོས་མི་གསུང་པར། འཇིག་རྟེན་ཀུན་ལ་སྙིང་བརྩེ་མཐའ་ཡས་པས། །གཞན་གྱིས་གསོལ་བ་བཏབ་ལ་ང་མི་སྟོན། །སྐྱེ་བོ་དེ་དག་ཚངས་ལ་དད་པ་སྟེ། །དེ་ཡིས་གསོལ་བ་བཏབ་ན་འཁོར་ལོ་བསྐོར། །ཞེས་གསུངས་ཏེ་ཐུགས་ལས་ཆུང་ངུའི་ཚུལ་དུ་བཞུགས་པ་དང༌། སྟོང་གསུམ་གྱི་བདག་པོ་ཚངས་པ་གཙུག་ཕུད་ཅན་ཚངས་པ་འབུམ་ཕྲག་དྲུག་ཅུ་རྩ་བརྒྱད་བརྒྱ་བྱིན་དང་བཅས་པས་གསེར་གྱི་འཁོར་ལོ་དང་ཆོས་ཀྱི་དུང་ལ་སོགས་པ་ཕུལ་ཏེ་ནན་ཏན་ཆེན་པོས་ཡང་ནས་ཡང་དུ་གསོལ་བ་བཏབ་པ་ལ་བརྟེན་ནས་གཟོད་ཞལ་གྱིས་བཞེས་པ་ལྟར། འདིར་ཡང་སེམས་