[A:619] shangs rgya mtsho/ snar thang / rgyal rtse gur pa grwa tshang / zhwa lu sogs la kun rig dang / mi 'khrugs pa/ sman bla/ gnas brtan cho ga /rnam sras mdos chen sogs cho ga'i rigs shin tu mang bar gsar du btsugs pa sogs mdzad pa mtha' yas pas rgyal ba'i bstan pa rin po che phyogs mtha' thams cad bco lnga'i zla 'od kyis yongs su bsgos pa bzhin 'jig rten gyi khams su mngon par gsal bar mdzad pa dang / de la brten nas skye rgu ma lus pa bde legs kyi dpal la rang dbang du spyod pas/ ji ltar sangs rgyas rnams kyi sngon gyi smon lam rnam par dag pa dang / dge ba'i rtsa ba rgya chen po bsags pa sogs zag pa med pa'i las las byung ba'i zhing khams bde ba can dang mngon par dga' ba sogs yongs su dag pa'i 'jig rten gyi khams rnams la'ang 'gran par bzod pa'i phun sum tshogs pa ji snyed pa la bkod par mdzad do/ /khyed kyi legs mdzad rdo rje'i thog gis ni/ /mi mthun sa 'dzin rtse mo bsnyil ba las/ /thub bstan padmo'i gnyen gcig 'jig rten na/ /mngon par gsal ba'i dge mtshan 'byams su klas/ /pha mtha' mi mngon srid pa'i dga' tshal du/ /tha dad mos pa'i padmo kha 'bus par/ /'gro 'dis legs byas dang 'tshams thugs rje yi/ /'od zer stong gi thur mas 'byed la zhugs/ /gang gi legs gsung seng ge'i sgra yis ni/ /srid pa'i rgya mtsho ma lus 'dar ldan pa/ /de tshe 'jigs pa bzhin du gti mug las/ /ldang bar ma thob yid can su zhig mchis/ /sems can re re'i phyir yang khyed kyis ni/ /sman pa'i bgyi ba gang zhig ma stsal ba'i/ /phul byung mdzad pa gang de 'jig rten na/ /dus gsum