[A:252]gter gyi kha sgo dang po 'byed pa'i dge mtshan ci yang shar shing / khyad par mngon par rtogs pa rin po che'i ljon shing thugs 'dzin gnang skabs/ nam gung yol nas khyim bya'i mgrin glu dang po len tsam gyi dus su/ gzims khang gi nang thams cad nyin mo bzhin tu 'od kyis gsal lam mer gyur pa'i mdun gyi nam mkha'i gnas der/ dar zab 'bol brtsegs kyi steng du bla ma 'dzum pa'i zhal la dgyes pa'i nyams dang ldan pa/ dbu zlum skra dang na bza' dkar po can/ gzi mdangs rgyas shing zil chen po dang ldan pa zhig gi zhal ras mngon sum du mjal/ de ma thag tu bzod du med pa'i mos gus gdung shugs chen po bcos ma ma yin pa skyes pa dang / de'i zhal nas rigs kyi bu khyod kyi skye ba snga ma rnams kyi dge ba'i bshes gnyen nga yin no/ /ma 'ongs pa'i dus na nga'i drung du mngon par 'ong bar 'gyur gyi/ ring por mi thogs par shar gyi phyogs su song shig dang / don chen po 'grub par 'gyur ro/ /de la bar chad kyi chos gang yang med do/ /ces gsung lhang lhang byung ba'i skad cig de nyid la gzung 'dzin gyi snang zhen cha dang bcas pa gzhi med rtsa bral du yal nas 'od gsal lhan cig skyes pa'i ye shes mtha' dbus dang bral ba'i ngang du mnyam par gnas par gyur/ de las sangs nas 'di ltar snang ba thams cad sgyu ma'i 'khrul 'khor lta bu brdzun gyi za zi kho nar gzigs shing / 'jig rten gyi bya bzhag legs su re ba dang / thob thang go sa rnams la thugs nges par dbyung nas/ rgyal ba'i bstan pa'i ched du sku