[A:256]nges par rnyed pas/ rdo rje theg pa'i lam gyi rkang rtsa brtan po tshugs shing / shing rta chen po gnyis kyi nges don gyi gnas lugs gtan la dbab tshul so sor phyes nas gnad kyi don gcig tu babs pa la thugs gzhol bas bstan pa thams cad 'gal med du rtogs/ de tsam na dbu sems brgyud pa'i khyad par gnyis dang / gnyis 'dus kyi cho ga las thugs bskyed kyi go cha bzhes shing / theg pa mchog gi blo gros gzhan phan chos kyi nyi ma mtshan du gsol/ rgyal sras dpa' bo phyir mi ldog pa'i brtul zhugs 'chang / bsags sbyong spel gsum sngon du 'gro bas nyin re bzhin du thugs bskyed yang yang gsal 'debs gnang nas dus dang gnas skabs kun tu blo sbyong legs bshad kun btus/ blo sbyong snyan brgyud chen mo dag gi dgongs don dang / nyams kyi snang ba'i skabs su byung ba'i nyams khrid gnyis chig dril gyi tshul du nyams len gyi gzhi dang rtsa bar mdzad/ gzhan rnams la'ang de ltar gdams shing rjes su bstan/ dpal kye rdo rje'i rdul tshon gyi dkyil 'khor du zhugs nas dbang bzhi rdzogs par nos te gzhi yi sku bzhi la lam gyi sku bzhis gsos btab nas 'bras bu sku bzhi mngon du 'gyur pa'i rten 'brel gyi gnad gsang phyin ci ma log par gzigs/ de'i stobs bskyed pa'i phyir gzhi lam 'bras bu gsum dbyer med pa rig thog tu rang ngo sprod pa'i lta ba la phug thag chod/ de'i rtsal rdzogs pa'i phyir 'khrul snang lha snang du sbyong / lha snang ye shes su sbyong ba'i lam gyi che ba thams cad myong thog nas 'don