[A:257]pas/ phyi snod bcud/ nang rang lus/ gsang ba rang sems rnams bde chen gyi rol pa gcig tu smin pa'i nyams rtogs kyi rtser son/ de dag gi bar skabs su lugs de la dgos pa'i dbang byin rlabs/ lus sbyong 'phrul 'khor/ thun mong ma yin pa'i zhal khrid/ dam tshig dang sdom pa'i rnam bshad/ phyi nang gi bskyed rim gyi rnam bzhag dang bcas pa thugs la nges par mdzad do/ /zab mo lus kyi dkyil 'khor du dbang nos pa nas bzung ste/ rgyud sde thams cad kyi snying po stan thog gcig tu nyams su len pa/ lam dbang dus las mi yol ba len pa 'di yin pa'i nges shes kyis/ lus sems kyi dri ma bzhi sbyong zhing / zung 'jug sku bzhi'i 'bras bu rang 'khrungs su 'gyur pa'i nyams myong dang 'brel bzhin/ dbang bzhi'i chu bo mi nub pa la brtson par mdzad do/ /a ho rdo rje theg pa'i thabs mkhas 'dis/ /rdo rje'i lus la gnad du bsnun pa na/ /rdo rje bzhi yi ye shes chen po de/ /rdo rje'i bu la rang zhal ston bzhin mchis/ /ye shes mchog gi che skad 'don tsam gyis/ /rtsol ba med pa sems rgyud grol nus na/ /thams cad mkhyen pa'i ston pa thugs rje can/ /de 'dra kho nar mi mdzad ci zhig lags/ /rje btsun bla ma dam pa gang gis kyang / /lam gyi thun bzhi dbang bzhi'i chu rgyun spel/ /spros pa phyogs gcig tsam yang ma khegs bzhin/ /spros pa thams cad grol ba'i kha sbobs kyis/ /spros bcas thabs rnams dman par 'phen byed pa'i/ /spros bral de 'dra rje 'di'i zhal la med/ /rags pa sdom bzhi rgyud