[A:331]bzhed yongs su bskang bar mdzad/ bla ma gshegs nas dam tshig ma gshegs pa'i rdo rje'i bu slob gang dag mchis pa de dag gis bla ma'i dgongs rdzogs dang bstan rgyun la gcig tu bsams nas rnam dkar phrin las kyi 'khor lo'i mjug skyong ba mthong thos su gyur pa rnams la sor bcu snying gar zum nas rab dga'i smin ma zing nge blta zhing mchis/ da rung de ltar yang yang 'byung ba'i re smon shor/ rnal 'byor pa dam chos brtan pas rgyud sde rab 'byams kyi dkyil 'khor ras bris bzhengs/ sgrub sde gsar 'dzugs gnang zhing thugs bzhed skong / rdo rje slob ma thams cad kyi gral mthar 'khod pa 'an bus kyang / rje bla ma'i phrin las kyi cha shas phra mo tsam la srid zhu phul nus pa zhig byung nas bskal pa re bzang snyam pa 'ba' zhig gyur/ /slar smras pa/ ye shes sku ni mkha' khyab 'dus ma byas/ /mngon sum mjal ba'i skal pa dman na yang / /gang 'dul sgyu 'phrul 'char ba'i gzugs kyi sku/ /mthong ba'i bsod nams de yang da ltar zad/ /rtag 'dzin gdon gyis snying la gnas bcas pas/ /thar pa'i lam las rgyang ring bdag 'dra la/ /bka' rtags dang po mngon sum ston pa'i slad/ /brtse ba'i phyag rjes 'jog pa ma yin nam/ /sems can gcig phyir dmyal ba'i me dong nang / /mchong bzod thugs rje'i dbang phyug khyed lta bus/ /dmus long thang stong lus 'dra'i snyigs 'gro'i tshogs/ /yal bar 'dor ba'i gnas skabs ga la srid/ /tshad dang bral ba'i bde bar gshegs pa la/ /thugs rje'i spyod pa 'gag par mi 'gyur ces/ /