[A:༣༥༠]འགྲུས་བསྐྱེད་པ་དང༌། ངེད་ཀྱི་ཁྱིམ་ཚང་གིས་མར་ཁུར་འོང་བ་རྣམས་མ་ཟོས་པར་མར་མེ་ཁོ་ནར་བྱས་པས། རྐང་ལག་ཐམས་ཅད་ལ་སེར་ཀ་བྱུང༌། ལུས་ལ་མི་བཟོད་པའི་སྡུག་བསྔལ་བྱུང་ཚེ། ངན་སོང་གསུམ་གྱི་སྡུག་བསྔལ་རང་ཐོག་ཏུ་བླང་བའི་བློ་སྦྱོང་བྱས། ཤིན་ཏུ་བཟོད་དཀའ་བའི་ཚེ་སྣང་བ་སེམས་སྒྲུབ་སྔོན་དུ་འགྲོ་བའི་འཁོར་འདས་དབྱེར་མེད་ཀྱི་ལྟ་བ་ལ་བློ་བཞག་པས། གཟེར་ཟུག་རྣམས་ཞི་ནས་ཡལ་འགྲོ་བ་ཞིག་འོང་བར་འདུག །སྒྲུབ་པ་ལ་ཞུགས་པ་ནས་བཟུང་སྟེ་བར་ཆད་ཀྱི་རྣམ་གྲངས་མང་པོ་བྱུང་ཞིང༌། ཁྱད་པར་དུ་སྒྲུབ་པའི་སློང་ཤིག་དང་ལྗི་བས་ཟོས་པ་ལ་འབྲུམ་བུ་ཆེན་པོ་བྱུང་ནས་བཟོད་དཀའ་བ་ལྟ་བུ་དང༌། སྲོད་ཀྱི་དུས་སུ་གཉིད་ཀྱི་དོགས་ནས་སྒྲུབ་ཁང་གི་བར་ཁྱམས་ལ་སྟེགས་བུ་གྲུ་བཞི་གཡས་གཡོན་མདུན་རྒྱབ་གང་ལ་ཡང་མ་རེག་པ་ཞིག་གི་སྟེང་དུ་བསྡད་དུས་རབ་གསལ་གྱི་ཐད་སྒྲུབ་ཁང་སྟེང་གི་ཆུ་འགྲོ་བའི་ཝ་རྩེར། བྱ་ལུས་པོ་རྒོད་ཙམ་ལ་རྐེ་འདོམ་གང་ཡོད་སྙམ་པ་ཞིག་བབས་ནས། རབ་གསལ་ལ་ཁ་བལྟས། ཧས་སྒྲ་མང་པོ་འབྱིན་པ་མཐོང༌། སྒྲུབ་ཁང་ནང་ན་ཡོད་དུས། སྟེང་གི་རྒྱ་མཐོངས་གསལ་ཁུང་ཆུང་ངུ་ཞིག་ཡོད་པ་ལས་འུག་པ་གཉིས་རྐེ་བསྲིང་སྟེ་སྐད་འགྲིགས་བྱས་ནས་ཧ་སྒྲ་སྒྲོགས་པ་དང༌། དངོས་སུ་ཁང་ཐོག་ཏུ་རྒྱལ་གདོན་དང་བསེན་མོས་ཆགས་པའི་གཏམ་སྨྲ་བ་སོགས་བྱུང་བའི་ཚེ། ལྟ་བའི་གདིང་བསྐྱེད་དེ་ནག་པོ་ཆེན་པོའི་སྒོམ་བཟླས་ལ་བརྩོན་ནས་ཟློག་པ་བྱས་པ་བར་ཆད་ཆེ་བའི་དབང་གིས་ཅུང་ཟད་རེའི་མཚམས་ནས་གཉིད་དུ་ཡུར་བྱུང་དུས། སྔས་ཐད་ཀྱི་གཏོར་སྒྲོམ་རྒྱབ་ནས་ཉི་དགའ་རིན་པོ་ཆེས་གཉིད་མ་