[A:༣༤༩]གཞན་བརྗེ་བ་བསྒོམས་པས་ཇི་ལྟ་བ་བཞིན་མི་ནུས་པར་འདུག །སླར་ཡང་ཡུལ་དེ་ཉིད་ལ་ཆེད་དུ་དམིགས་ནས་ཡུན་རིང་བསྒོམས་པས། ཕྱིས་སངས་རྒྱས་ཐོབ་པ་ལ་རེ་བ་སྤུ་ཙམ་མེད་པར་དགྲ་བོ་ལ་སྙིང་རྗེ་ཁོ་ནས། དེའི་ལས་ཉོན་སྡིག་སྡུག་ཐམས་ཅད་རང་ལ་ལེན་ཐུབ་པ་ཞིག་བྱུང་བ་ཡིན་གསུངས། དེ་ནས་རྒྱུད་གསུམ་ལ་འཇུག་པའི་སྔོན་འགྲོ་བསགས་སྦྱངས་འཇུག་གསུམ་ལས་ཚོགས་བསགས་པ་མཎྜལ་གྱི་རྣལ་འབྱོར་སྐབས། ཆོས་རྗེ་ས་སྐྱ་པཎྜི་ཏས། ཕྱི་ནང་གསང་གསུམ་གྱི་མཎྜལ་གྱི་ཡི་གེར། མཎྜལ་ཁྲུ་གང་ལས་མི་ཆུང་བ་དགོས་སོ་ཞེས་གསུངས་པ་ལྟར། ལས་སླ་ལ་མ་ཤོར་བར་མཎྜལ་ཁྲུ་གང་བ་ཞིག་བསྒྲུབས། ཚོམ་བུ་འགོད་རྒྱུ་ཡང་རབ་རིན་པོ་ཆེའི་ཚོམ་བུ་དགོས་གསུངས་པ་ལྟར། གསེར། དངུལ། རང་བྱུང་ཟངས་ཞུན། བྱེ་རུ། གཡུ། གཟི་སོགས་གང་འབྱོར་རྣམས་དུང་དང༌། འགྲོན་བུ་རྣམས་གཞི་བྱས་པ་ལ་བསྲེས། ཁྱད་པར་དུ་འཇམ་མགོན་ཀོང་སྤྲུལ་རིན་པོ་ཆེའི་གཏེར་བྱོན། ཆོས་འཁོར་ནོར་བུའི་རྡུལ་ཕྱེ་མང་པོ་ཡོད་པ་རྣམས་དེ་ལ་བསྲེས། བྱུག་པ་རྣམས་རབ་ཁ་ཆེའི་གུར་གུམ་དགོས་གསུངས་པ་ལྟར་འབད་རྩོལ་ཆེན་པོ་བྱས་ཏེ་རྙེད་པ་རྣམས་དང་བཅས། སེམས་ཡེངས་མ་ཤོར་བར་དམིགས་རྣམ་ཞིབ་ཆ་དང་བཅས་མཎྜལ་འབུམ་ཕྲག་བཅུ་ཕུལ། མཎྜལ་ཕྱི་བའི་ཚེ་སེམས་ཅན་ཐམས་ཅད་ཀྱི་སྡིག་སྒྲིབ་འདགས་པའི་བློ་སྦྱོང་དང་བཅས་ཏེ་བརྩོན་འགྲུས་དྲག་པོ་བྱས་པས། ལག་པའི་མཁྲིག་མ་ནས་གྲུ་མོའི་བར་གྱི་པགས་པ་ཐམས་ཅད་བརྡོལ་ནས་རྨར་སོང༌། གཞན་ཡང་ཕྱག་འབུལ་བ་ལ་བརྩོན་