[A:༣༥༢]བསྡམས་ནས་མཐར་མ་གྲོལ་གྱི་བར་མི་ལོ་བཅུ་དྲུག་ལ། མར་ཟ་རྒྱུ་ཡོད་པ་དང༌། བསྔོ་རྟེན་ཕྲན་བུ་བྱུང་བ་རྣམས་ཀྱིས་མར་མེ་མང་པོ་དང༌། བདུན་ཚར་ཆ་བདུན་ཡོད་པ་རྣམས་ཉིན་རེ་བཞིན་ལན་གསུམ་རེ་ཕུལ་བས་ཡོན་ཆབ་འབུམ་ཕྲག་བརྒྱད་སོང༌། མཆོད་པ་དེ་རྣམས་ཀྱང་སེམས་བསྐྱེད་དང་དམིགས་པ་རྒྱ་ཆེན་པོ་བྱས། འཇམ་དབྱངས་བླ་མ་ལ་གསུང་ངག་རྩ་བརྒྱུད་ཀྱི་བླ་མ་ཡི་དམ་ཀྱེ་རྡོར་ལྷ་དགུ་སོགས་སྐྱབས་གནས་མཆོག་གསུམ་རྒྱ་མཚོ་མ་ལུས་པ་འདུས་པར་དམིགས་ནས། འཇམ་དབྱངས་བླ་མའི་བསྟོད་པ་སྤྱི་དང་ཁྱད་པར་ཤེས་བྱ་མ་འདོན་བཞིན་པའི་ངང་ནས་ཕྱག་འཚལ་བ་སྔ་ཕྱི་ཀུན་བསྡོམས་པས་ཕྱག་འབུམ་ཐེར་བཞི་བཅུ་ཞེ་གསུམ་སོང༌། དེ་དག་གི་སྐབས་སུ་འདོན་དོན་གསོལ་གདབ་ཀྱི་གཙོ་བོ་ནི། འཇམ་དབྱངས་བླ་མ་ས་སྐྱ་པཎྜི་ཏ་ཁྱེད་ཐུགས་དགྱེས་པའི་ཕྲིན་ལས་ཐམས་ཅད་རྗེས་སུ་བསྒྲུབ་པའི་སླད་དུ། འཇམ་དབྱངས་བླ་མ་སྐྱབས་གནས་ཀུན་འདུས་ཁྱེད་ལ་སྙིང་ནས་དད་པས་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །གསོལ་བ་འདེབས་སོ། །ཐབས་འདི་ལ་བརྟེན་ནས་བསྐལ་པ་གྲངས་མེད་གསུམ་གྱི་ཚོགས་གཉིས་སྐད་ཅིག་ཉིད་ལ་རྫོགས་པར་བྱིན་གྱིས་བརླབ་ཏུ་གསོལ། སྡིག་སྒྲིབ་ཉེས་ལྟུང་དྲི་མའི་ཚོགས་བག་ཆགས་དང་བཅས་པ་ཐམས་ཅད་སྐད་ཅིག་ལ་ད་ལྟ་ཉིད་དུ་བྱང་ཞིང་དག་པར་བྱིན་གྱིས་བརླབ་ཏུ་གསོལ། འཇམ་དབྱངས་བླ་མའི་བྱིན་རླབས་སྙིང་ལ་ཞུགས་ནས། ཐོས་བསམ་སྒོམ་གསུམ་གྱི་ཡོན་ཏན་ཐམས་ཅད་སྐད་ཅིག་ཉིད་ལ་ཡོངས་སུ་རྫོགས་ནས། བསྟན་པ་དང་སེམས་ཅན་གྱི་དོན་ནམ་མཁའི་མཐའ་དང་