[A:༣༧༠]ནས་གསུངས་བྱུང་བས། དམ་ཅན་རྒྱ་མཚོ་བྲན་དུ་ཁོལ་བ་ལ་ཐེ་ཚོམ་མེད་པར་སྣང་ངོ༌། །ཡང་སྐབས་ཤིག་འཆི་ལྟས་མང་པོ་བྱུང་བ་ན་སྒྲོལ་དཀར་སོགས་རིམ་གྲོ་མང་དུ་བྱས་ཀྱང་མ་བཟློག་པར། ཟངས་མདོག་དཔལ་རི་རྟེན་དང་བརྟེན་པར་བཅས་པ་མདུན་དུ་དམིགས་ནས་གསོལ་འདེབས་སྙིང་ཐག་པ་ནས་བགྱིས་ཤིང༌། སིདྡྷི་ཁྲི་གཅིག་བཟླས་པས་གུ་རུ་རིན་པོ་ཆེ་རྟེན་དང་བརྟེན་པར་བཅས་པ་མངོན་སུམ་དུ་མཇལ་བའི་གསལ་སྣང་བྱུང་བས་དེའི་ཕྱིར་ནང་ནས་རླུང་ལྟས་ལོག་ཅིང༌། སྒྲ་མི་སྙན་གྱི་ཚེ་སྒྲུབ་བྱས་པ་གནད་སྨིན་དུ་གྱུར་ཅིང་ཚེ་གེགས་ཞིའོ་གསུངས། ཡང་སྐབས་ཤིག་གཟིམ་ལམ་དུ། ཁོང་ངོར་དུ་ཕེབས་འདུག་པ་ལ། དེའི་ལྷ་ཁང་གཞན་ཐམས་ཅད་ཀྱི་སྟེང་གི་རྒྱལ་མཚན་སོགས་འགྱེལ་འདུག་པ་ལ། ལམ་འབྲས་ལྷ་ཁང་གི་རྒྱལ་མཚན་སོགས་མ་ལོག་པར་འདུག །ལོག་བྲིས་ཀྱི་བིརྺ་པའི་སྐུ་དེའི་མདུན་དུ་ཕྱིན་ནས་མར་མེ་ཞིག་ཕུལ་ནས། གསུང་ངག་རིན་པོ་ཆེའི་བསྟན་པ་ཕྱོགས་ཐམས་ཅད་དུ་དར་རྒྱས་སུ་འོང་བ་ཞིག་གསོལ་བ་བཏབ་པས། ཁོང་གི་གསུང་འབྱོན་ནས། ད་ང་རང་བོད་དུ་ལན་གཉིས་ལས་འོང་མི་དགོས། ཆོས་འདི་ཕྱོགས་ཐམས་ཅད་དུ་ཁྱབ་གདལ་དུ་དར་བ་ཞིག་དཀའ་འདུག་གསུངས་པ་ཞིག་བྱུང་བས། དེའི་ལྟས་ལ་དཔགས་ན། སྔོན་དུས་ཡོད་པའི་རྒྱུད་སྡེ་བདུན་ཅུ་རྩ་གཉིས་ཀྱི་བཤད་པ་སོགས་ཕལ་ཆེར་ནུབ་ཀྱང༌། གསུང་ངག་འདིའི་བསྟན་པ་ད་དུང་མི་རབས་གཉིས་ཙམ་ལ་གནས་པ་ཨེ་ཡིན་ན་ཞེས་གསུངས་པ་སོགས་མཐའ་ཡས་ཀྱང་རེ་ཞིག་དེ་ཙམ་མོ། །དུས་གསུམ་གྱི་ཤེས་བྱ་ཐམས་ཅད་སྒྲིབ་མེད་དུ་མཁྱེན་ཚུལ་ལ། སྔོན་གྱི་སྐུ་སྐྱེ་བའི་ཕྲེང་བ་རྗེས་སུ་དྲན་ནས་གསུངས་པ་ནི། རབ་འབྱམས་པས་