[A:༣༤༢]དང་མི་དགའ་བ་མེད་པར་སྙིང་ནས་གུས་པ་སྐྱེ་བ་ཞིག་ཡིན། ངས་གྲོ་ཆན་གྲང་མོ་ཞིག་ཟོས་པའི་རྐྱེན་གྱིས། གྲང་གཞིའི་ནད་ངན་པ་ཞིག་བྱུང་བ་ལ། བླ་མའི་ཞལ་ནས་ཁྱོད་ཀྱི་སྤྱི་བོར་རྡོར་སེམས་བསྒོམ་པའི་ཐུགས་ཀའི་ཧཱུྃ་ལས་བདུད་རྩི་ཁྲོ་ཆུའི་དྲོད་དང་ལྡན་པ་ལྟ་བུུ་གྲང་བའི་ནད་ཐམས་ཅད་སེལ་ནུས་པ་ཞིག་བབས་ནས་ལུས་ཀྱི་ནང་ཐམས་ཅད་གང༌། གྲང་བའི་ནད་ཐམས་ཅད་འོག་སྒོ་གཉིས་ནས་ཕྱིར་འཐོན་པའི་དམིགས་པ་གྱིས་ལ་བསྒོམ་གསུངས་པ་ལྟར། སེམས་མ་ཡེངས་པར་ཐུན་རེ་བསྒོམ་པའི་ཚེ་ལུས་ལ་དྲོད་སྐྱེས་པ་ཞིག་བྱུང༌། དེ་ཡུན་བསྲིངས་པས་གྲང་གཞིའི་ནད་གཏན་ནས་མེད་པ་ཞིག་རེད་སོང༌། རང་ལོ་བཅོ་བརྒྱད་པར་དབུས་གཙང་གི་ཕྱོགས་སུ་རིམ་བགྲོད་ཀྱིས། དཔལ་ཨེ་ཝཾ་ཆོས་ལྡན་དུ་སླེབས། ངོར་གྱི་གདན་རབས་ང་བརྒྱད་པ་ལྕེ་བཙུན་ངག་དབང་བློ་གྲོས་སྙིང་པོའི་དྲུང་ནས། འབྱུང་འདུལ། རྣམ་རྒྱལ་མ། རི་ཁྲོད་མའི་རྗེས་གནང་གསུམ་སྔོན་དུ་འགྲོ་བའི་སྒོ་ནས། ལམ་འབྲས་ཚོགས་བཤད་ཀྱི་སྨིན་གྲོལ་ཡོངས་རྫོགས་དང༌། ཀྱེ་རྡོར་བཀའ་བབས་ཕྱི་མ་གསུམ་གྱི་དབང༌། པོད་སེར་པོད་དམར་གྱི་ལུང༌། ཐར་རྩེ་པཎ་ཆེན་གྱིས་བསྒྲིགས་པའི་ཆོས་སྤྱོད་པོ་ཏིའི་ལུང༌། དཔལ་མགོན་ཞལ་བསྙེན་དུས་ཀྱི་རྗེས་གནང་རྣམས་ཐོབ་ཅིང༌། ཚིགས་གསུམ་རིམ་ནོད་ཀྱིས་བསྙེན་པར་རྫོགས་པ་དགེ་སློང་གི་སྡོམ་པ་ཐོབ། དེ་ནས་ས་སྐྱ་གོང་དུ་ཕྱིན། རབ་འབྱམས་པ་ཤེས་རབ་ཆོས་འཕེལ་གྱི་དྲུང་ནས། འདུལ་བ་མདོ་རྩ། ལྷ་ཁང་ཆེན་པོའི་མཁན་པོ་བྱམས་པ་ཆོས་བཀྲ་ཤིས་ཀྱི་མདུན་ནས་སྡོམ་གསུམ་འཇམ་དབྱངས་བླ་མའི་དགོངས་རྒྱན་གྱི་བཤད་ཁྲིད་ཐོབ། དབྱར་ཁར་