[A:༣༤༣]ངོར་དུ་མར་ལོག་མཁན་ཆེན་གདན་ས་པའི་དྲུང་ནས། རྡོ་རྗེ་ཕྲེང་བ་ཀྲི་ཡ་ས་མུཙྪ་དང་བཅས་པའི་དབང་ཆེན་ཞེ་ལྔ། ཡིག་ཆ་ཐར་པཎ་གྱི་རྡོར་ཕྲེང་མཛེས་རྒྱན་གྱི་ལུང་བཅས་ཐོབ། དེ་དུས་ངོར་ན་སྐུ་ཡོན་མཁས་པའི་རྩེ་མོར་སོན་པ་མཆོག་སྤྲུལ་ཤེས་རབ་རྒྱ་མཚོ་ཉིད་གྲགས་ཆེ་བས་དེ་ཉིད་ཀྱི་དྲུང་ནས། ལམ་འབྲས་སྣང་རྒྱུད་མཛེས་རྒྱན། ཟླ་ཟེར་མན་ངག་རྣམ་བཤད། ཉི་ཟེར་རྣམས་ལ་ལྟ་རྟོག་དང༌། མ་གོ་བ་མཁས་མཆོག་དེ་ཉིད་ཀྱི་དྲུང་ནས་དོགས་གཅོད་ཞུས། ཀྱེ་རྡོར་ལམ་དབང༌། གྲུབ་རྒྱལ་ལུགས་ཀྱི་བསྐྱེད་རྫོགས་ཟུང་འཇུག་གི་ཁྲིད། ཡིག་ཆའི་སྐོར་མང་པོའི་ལུང༌། ངོར་ལུགས་མགོན་པོ་ལྷ་བརྒྱད་ཀྱི་རྗེས་གནང༌། སྤྱོད་འཇུག་གི་ལུང་རྣམས་ཞུས། དེའི་དགུན་རང་ཡུལ་ལ་ལོག་རྒྱུ་བྱས་པའི་ཚེ། ཉིན་གཅིག་རྐང་པའི་རྟིང་པ་རྡོ་ལ་བརྡབ་པའི་རྐྱེན་བྱས་རྐང་པ་ཤིན་ཏུ་ན། ཞ་བོར་འགྱུར་ལ་ཁད་བྱུང༌། ཞག་ཤས་ནས་ཅུང་ཟད་བདེ་བར་སོང་ཡང༌། ཕྱི་རྟིང་སྐྲངས་པ་ལས་རྣག་རྡོལ་ནས་ཟླ་བ་བཞི་ལྔ་ཙམ་གྱི་བར་དུ་ན་བ་བྱུང་བ་ནི། ངོར་པའི་ཆོས་སྐྱོང་རྣམས་ཀྱིས་ཁམས་ཕྱོགས་སུ་མི་གཏོང་བའི་རྟགས་སུ་འདུག །མར་ལམ་ལྷ་ས་རུ་ཇོ་བོ་མཇལ་བ་ལ་ཕྱིན། ལྷ་སའི་རྟེན་གསུམ་རྣམས་ལེགས་པར་མཇལ་ཞིང་སྨོན་ལམ་སྙིང་ནས་བཏབ། དེ་ནས་རིམ་བགྲོད་ཀྱིས་འོང་བ་འདམ་གཞུང་སྐོར་དུ་སླེབས་པའི་ཚེ། ཕྲན་གྱིས་དེ་སྐབས་ལམ་དུས་ཐུན་བཞི་རེ་འདོན་གྱི་ཡོད་པ་སོགས་ཁ་འདོན་གྱི་ཁུར་ལྕི་བ་དང༌། གྲང་ངད་དང་དཀའ་ཚེགས་ཆེ་བའི་སྟོབས་ཀྱིས། བྲག་རྫོང་མའི་ཁ་འདོན་ཉིན་མང་པོ་ལ་ཆད་ཤོར། ནུབ་གཅིག་འགྱོད་པ་དང་བཅས། མགོན་པོའི་ཐུགས་དམ་རྒྱས་པ་