[A:372]da lta'i shes bya mdo sngags kyi zab gnad rnams tshogs sgrogs mi mdzad pa ma gtogs/ mkhas pa sus kyang bsgrun du med par mngon sum du grub pa dang / khyad par du gzhan gyi sems la rnam rtog ngan pa skyes pa rnams de ma thag tu mkhyen nas gsungs pa sogs shin tu mang la/ 'byung 'gyur gyi lung bstan thams cad kyang ji lta ba bzhin thog tu babs pa'i tshul ni/ chos rje rin po che 'di nyid bcad rgya dam por bzhugs skabs/ bla ma zla 'od nged dpon slob rnams mjal du phyin nas zhu 'phrin phul bas/ bug sgor byin rlabs dang chos 'brel re gnang thabs zhus tshe/ ci yang ma thob nas phyir 'ong skabs nged la sger du gsung dzar zhig gnang nas/ khyed la khong gis rdo rje theg pa'i smin grol spyi dang / gsung ngag rin po che lam 'bras kyi gdams pa sbyin pa'i skal ba yod ces gsungs pa dang / phran gyis nyid rin po che ni sku mtshams las mi grol bar 'dug /bdag ni phan chad sga khog tu 'ong rtsis med pas 'di ci la gsungs zhus par/ ma 'ongs pa na nga rang sman shod dang / rnam rgyal mgon khang sogs su 'ong ba'i dus shig 'byung / de dang khyed tsho'i bar nas thag ji tsam yod/ 'on kyang da lta gzhan la ma bshad ces gsungs pa phyis thog tu 'khel ba dang / de nas nga rang gis dang por gdan 'dren zhus tshe/ rje'i zhal snga nas/ da lan khyed rnams 'ong ba dang mnyam du nged la grib cig phog /sgra gcan gyis nged kyi lags pa la dkris 'dug pa'i snang ba zhig kyang byung / mdun du gzig cig kyang phar tshu rgyugs pa 'dug pas gza' dmar gyis gnod pa yin pa 'dug /da nga rang khyed tsho'i yul du 'gro e phod na gsungs/