R215: bla ma brgyud pa'i rnam par thar pa ngo mtshar snang ba/ lam 'bras slob bshad/ {bod yig glog rdul dpe cha/}

  • Pagination (Witness A): 121
[A:121]lngas lam yongs su rdzogs pa'o/ /zhes gsungs te/ rten 'brel tshogs na me 'byung ba bzhin du bskyed rdzogs kyi rten 'brel tshogs pa gnad du che bar bzhed do/ /de ltar slob dpon drug gi bzhed pas gnad du che ba drug las kyang / gzhan lnga po'ang rten 'brel lnga gnad du che ba 'dir 'dus pas/ lam 'di ni sgro skur thams cad dang bral ba'i lam yin no/ /de ltar bla ma'i gsung dang dam pa'i ngag /brgyud pa'i tshig la rig pas legs dpyad nas/ /mtha' gnyis spangs te brgyud pa'i bla ma yi/ /mdzad spyod rmad byung ngo mtshar dpag yas las/ /che longs tsam zhig bsdus nas 'dir bkod do/ /dam pa'i yon tan gting mtha' mi dpogs shing / /bdag blo srin bu me khyer lta bu yis/ /mos pa'i blo yis cung zad dpyad pa la/ /nongs pa gang de bla ma'i tshogs la bshags/ /dge bas rtag tu bla ma'i zhabs padmor/ /gus pas bsten cing de dag thugs rje yis/ /nye bar bzung ste sangs rgyas sar bgrod shog Colophon /bla ma brgyud pa'i rnam thar ngo mtshar snang ba zhes bya ba 'di ni/ rdo rje 'dzin pa bsod nams rgyal mtshan dpal bzang pos nyi sgrol gyi lo sa ga zla ba'i nyer gsum la kha'u skyed lhas kyi dgon par sbyar ba'i yi ge pa ni dge ba'i bshes gnyen shes rab rdo rjes bgyis te mthar phyin par grub pa'o/ /sa mApta mi thI//