[A:6] gang yin ngo ma shes kyang yid du 'ong bas ming gnyen po gsang ba zhes bya bar btags te phyag mchod byas pas rgyal srid dang mnga' thang cher rgyas te 'phel bas dam pa'i chos kyi dbu brnyes so/ /de nas rgyal rabs lnga nas/ srong btsan sgam po'i ring la rgya gar gyi yi ge la mkhas pa li byin gdan drangs nas/ glang khams pa go cha dang thon mi sambho Ta gnyis kyis bod kyi yi ge brtsams/ skad la skad dod btsal te/ dam pa'i chos bsgyur du btub bam mi btub pa lta ba'i ched du sgrung rgyud la sogs pa bsgyur bas btub par go nas/ mdo za ma tog /padma dkar po/ tsintA ma Ni/ 'dus pa rin po che'i tog dang / rgyal po mdo lnga la sogs pa mang du bsgyur/ lha khang mang du bzhengs/ chos spyod dge ba bcu spel zhing gtan khrims rnam pa lnga bcas/ bshad nyan gyi srol dang chos grwa mang du btsugs nas dam pa'i chos kyi srol gtod de/ phyis gdung rabs lnga na chos dar bar lung bstan to/ /de nas gdung rabs lnga lon pa na/ rgyal po khri srong lde'u btsan byon nas/ de'i ring la slob dpon zhi ba 'tsho dang / padma 'byung gnas gdan drangs te/ slob dpon padmas bod kyi lha 'dre gdug pa can rnams btul/ bsam yas bzhengs pa'i sa chog mdzad/ slob dpon zhi ba 'tshos rab gnas mdzad/ gzhan yang paNDi ta sangs rgyas gsang ba dang / mkhan po dA na shI la dang / dharma kIrti dang / kA ma la shI la dang / bi ma la mi tra dang / shI lendra bo dhi la sogs pa mang po gdan drangs nas/ gzhon nu blo gsal ba mang po rnams la sgra dang lo tsA ba slob tu bcug pa las thog mar lo tsA ba sad mi mi bdun bya ba byung ste/ de la rgan gsum ni/ dbas ratna rakShi ta rin chen srung ba zhes bya ba bod