[A:༦] གང་ཡིན་ངོ་མ་ཤེས་ཀྱང་ཡིད་དུ་འོང་བས་མིང་གཉེན་པོ་གསང་བ་ཞེས་བྱ་བར་བཏགས་ཏེ་ཕྱག་མཆོད་བྱས་པས་རྒྱལ་སྲིད་དང་མངའ་ཐང་ཆེར་རྒྱས་ཏེ་འཕེལ་བས་དམ་པའི་ཆོས་ཀྱི་དབུ་བརྙེས་སོ། །དེ་ནས་རྒྱལ་རབས་ལྔ་ནས། སྲོང་བཙན་སྒམ་པོའི་རིང་ལ་རྒྱ་གར་གྱི་ཡི་གེ་ལ་མཁས་པ་ལི་བྱིན་གདན་དྲངས་ནས། གླང་ཁམས་པ་གོ་ཆ་དང་ཐོན་མི་སམྦྷོ་ཊ་གཉིས་ཀྱིས་བོད་ཀྱི་ཡི་གེ་བརྩམས། སྐད་ལ་སྐད་དོད་བཙལ་ཏེ། དམ་པའི་ཆོས་བསྒྱུར་དུ་བཏུབ་བམ་མི་བཏུབ་པ་ལྟ་བའི་ཆེད་དུ་སྒྲུང་རྒྱུད་ལ་སོགས་པ་བསྒྱུར་བས་བཏུབ་པར་གོ་ནས། མདོ་ཟ་མ་ཏོག །པདྨ་དཀར་པོ། ཙིནྟཱ་མ་ཎི། འདུས་པ་རིན་པོ་ཆེའི་ཏོག་དང༌། རྒྱལ་པོ་མདོ་ལྔ་ལ་སོགས་པ་མང་དུ་བསྒྱུར། ལྷ་ཁང་མང་དུ་བཞེངས། ཆོས་སྤྱོད་དགེ་བ་བཅུ་སྤེལ་ཞིང་གཏན་ཁྲིམས་རྣམ་པ་ལྔ་བཅས། བཤད་ཉན་གྱི་སྲོལ་དང་ཆོས་གྲྭ་མང་དུ་བཙུགས་ནས་དམ་པའི་ཆོས་ཀྱི་སྲོལ་གཏོད་དེ། ཕྱིས་གདུང་རབས་ལྔ་ན་ཆོས་དར་བར་ལུང་བསྟན་ཏོ། །དེ་ནས་གདུང་རབས་ལྔ་ལོན་པ་ན། རྒྱལ་པོ་ཁྲི་སྲོང་ལྡེའུ་བཙན་བྱོན་ནས། དེའི་རིང་ལ་སློབ་དཔོན་ཞི་བ་འཚོ་དང༌། པདྨ་འབྱུང་གནས་གདན་དྲངས་ཏེ། སློབ་དཔོན་པདྨས་བོད་ཀྱི་ལྷ་འདྲེ་གདུག་པ་ཅན་རྣམས་བཏུལ། བསམ་ཡས་བཞེངས་པའི་ས་ཆོག་མཛད། སློབ་དཔོན་ཞི་བ་འཚོས་རབ་གནས་མཛད། གཞན་ཡང་པཎྜི་ཏ་སངས་རྒྱས་གསང་བ་དང༌། མཁན་པོ་དཱ་ན་ཤཱི་ལ་དང༌། དྷརྨ་ཀཱིརྟི་དང༌། ཀཱ་མ་ལ་ཤཱི་ལ་དང༌། བི་མ་ལ་མི་ཏྲ་དང༌། ཤཱི་ལེནྡྲ་བོ་དྷི་ལ་སོགས་པ་མང་པོ་གདན་དྲངས་ནས། གཞོན་ནུ་བློ་གསལ་བ་མང་པོ་རྣམས་ལ་སྒྲ་དང་ལོ་ཙཱ་བ་སློབ་ཏུ་བཅུག་པ་ལས་ཐོག་མར་ལོ་ཙཱ་བ་སད་མི་མི་བདུན་བྱ་བ་བྱུང་སྟེ། དེ་ལ་རྒན་གསུམ་ནི། དབས་རཏྣ་རཀྵི་ཏ་རིན་ཆེན་སྲུང་བ་ཞེས་བྱ་བ་བོད་