[A:72]lo smal lo zla ba'i tshes bcu gcig la bde ba can gyi 'jig rten gyi khams su mngon sum du gshegs par gyur to/ /'di nyid mi thub zla ba'i sprul par yang grags so//
! gsum pa rje btsun chen po grags pa rgyal mtshan te/ 'di'i rnam par thar pa ni/ skye ba brnyes pa'i khyad par/ bslab gsum gyi yon tan brnyes tshul/ phrin las ji ltar mdzad tshul/ lung bstan dang skye ba dran pa'i tshul bzhis rtogs pa las/ dang po ni/ skye ba bzhes pa na klu'i rgyal po'i tshul du yum la rmi lam bstan nas bkra shis pa'i ltas dang bcas te sku bltams shing / smra shes nas dben pa la dga' zhing brkam chags med la/ yon tan sgrub pa la brtson pa byis pa'i spyod pa las 'das pa zhig tu gyur to/ /gnyis pa ni/ dgung lo brgyad lon pa na byang sems zla ba rgyal mtshan las tshangs spyod kyi dge bsnyen nos te/ de phyin chad 'phral rab tu byung ba las btsun pa mdzad cing / mnyes kyang rab tu byung ba la mnyes/ 'khor dge slong kun la gso sbyong ma chag par mdzad de/ ja ni bdag gis 'dren gsungs nas khong rang yang pha tshad nas gzigs/ gzhan yang skye ba snga ma'i dge slong gi bag chags kyis chos ston gsol tsa na thugs yengs pa'i dus su nga'i 'di la sbyin len ma byas snyam pa 'byung / mchod pa'i dus su'ang dam tshig gi rdzas tsam re las ye mi gsol ba zhig dang po byung / ji zhig tsa na dum re gsol/ de bzhin mdzad pa ci lags zhus pas/ nga la dang po chang la 'dod 'dun drag po rmi lam tshun chad du 'thung ba rmi ba zhig byung / 'di bdud las yin snyam nas ma 'thungs/ da 'dod pa de tsam ma 'dug pas dum re bsten gsung / de min