[A:55]ni btsugs/ sde snod mtha' dag gtan la 'bebs pa'i dga' ston chen po mdzad pa'i tshe/ me pho byi ba'i lo rgyal gyi zla ba'i tshes bco lnga la gso sbyong byas pa'i dus su/ dge slong stong phrag lhag cig tshogs pa'i dus su/ shAkya'i dge slong kun dga' rgyal mtshan dpal bzang po zhes bya bas dus bzangs kyi mdo dang / so sor thar pa'i mdo shin tu dag par bton nas sangs rgyas kyi bstan pa la byi dor byas pa'i dus su brtsis pa na me pho byi ba'i lo 'di yan chad la de bzhin gshegs pa mya ngan las 'das nas lo sum stong sum brgya lnga bcu tham pa lon no/ /slan chad kyang shes ldan rnams kyis 'di bzhin du brtsis shig /dus 'di la rgya gar na nyan thos sendha pa rnams dus brjod pa'i tshe mya ngan las 'das nas lo 'di song brtsi ba cig yod/ de'i lugs la lo stong phrag gcig dang bdun brgya dang lnga bcu lhag cig lon zer ba de ni/ ma ga dha'i byang chub chen po'i sku gzugs de slob dpon mtho btsun grub rje dang bde byed bdag pos mdzad par bzhed nas tsandan gyi lde gu spungs pa na/ rang byung du byung ba'i dus de nas bzung nas lo tshigs la 'khrul nas mya ngan las 'das nas lo 'di song zhes brtsis la/ de'i rjes su 'brangs nas deng sang rgya gar gyi paNDi ta phal cher yang de ltar zer la/ kha che paNDi ta chen po sdom brtson bsod snyoms pa'i zhal snga nas kyi dpal sa skyar lcags pho rta'i lo la dbyar gnas pa'i tshe brtsis pas mya ngan las 'das nas lo stong phrag gcig dang bdun brgya lnga bcu rtsa gsum song la/ de slan chad sangs rgyas kyi bstan pa lo sum stong nyis brgya dang bzhi bcu zhe drug gnas so zhes pa yang nyan thos sendha pa sngon du sgrogs pa'i gtam rgyud la brten nas rang gi rtog dpyod ma mdzad par zad pas 'di la yid brtan par mi bya'o/ /de dag mi 'thad pa'i tshul chos rje sa skya pa nyid kyi zhal snga nas 'di skad gsungs te/ sangs rgyas mya ngan