rgyas chos kyi gdams pa duu ma stsal bas bstan 'dzin gyi skyes bu mang du bskrun pa'i ngang / re zhig zhing 'di'i gdul bya de tsam du gzigs nas/ sku dbon rnal 'byor 'jam dpal bzang po dang / sa dbang bla chen sogs la zhal chems lhug par stsal cing / dgung lo lnga bcu rtsa drug par ngo mtshar ba'i ltas du ma dang bcas te/ sku'i bkod pa bsdu ba'i tshul bstan pas/ chos rgyal bla slob rnams sngar las kyang dad mos je cher gyur nas gshegs rdzong rnams mthar phyin par mdzad do/ /'di nyid kyi rnam thar rgyas pa thams cad mkhyen pa byams pa kun dga' bstan pa'i rgyal mtshan gyis mdzad pa las rtogs par bya'o//
! gdan rabs zhe bzhi pa mkhas grub ngag dbang dam chos ni/ rong yul pho sgang steng zhes par mkhas grub mang po byon pa'i brgyud du sku bltams/ sku tshe du ma nas dam pa'i chos la spyod pa'i 'bras rtags theg chen gyi rigs sad/ nges 'byung gis rgyud bskul te ngor e wa~M chos ldan gyi gnas su byon/ rgyud chung bzhi dang kun tu dgos pa'i gzhung bdun sogs la mkhyen rab rgyas/ mkhan chen sangs rgyas grags pa las bsnyen par rdzogs/ byang chub mchog tu thugs bskyed/ smin grol gser 'gyur rtsis sgo gsum lha sngags ye shes kyi rang bzhin du bsgyur/ ngag dbang phun tshogs don grub/ mkhas grub kun dga' bsod nams/ thar rtse nam mkha' 'chi med rnams las smin byed dbang / grol byed khrid/ rgyab brten lung gi skor dpag med gsan/ gzhi tshul khrims rnam dag la brten nas/ thos bsam sgom gsum mthar phyin pa'i grub 'bras byams pa nam mkha' 'chi med kyi gdan tshab tu chos srid lugs bzang gi mngon par mtho ba'i khri la zhabs zung g.yo med bkod de gsung ngag lam 'bras kyi dbang lung khrid sogs kyi skor/ rgyud sde bzhi'i smin grol gyi rgyun gang bzhugs/ so byang gi sdom pa sogs zang zing med pa'i chos kyi sbyin pas slob tshogs mtha' yas pa tshim par mdzad/ gsung las skyes pa'i chos kyi sras ngag dbang blo gros bzang po/ yongs 'dzin dpal ldan chos kyi rgyal mtshan sogs khyad par 'phags pa'i bstan 'dzin mang po byon pa'i rtsa lag dam par gyur ba zhig go/
! gdan rabs zhe lnga pa mkhan chen bsod nams dpal 'byor ni/ mdo smad li'u thang mo la gshis zhes par sku 'khrungs/ chung nas byis pa'i spyod pa las 'das te dad pa snying rje shes rab sogs yon tan gyi rtsa ba rab tu brtan/ ngor e wa~M chos ldan gyi grwa sar zhugs/ rgyud chung bzhi dang / kun tu dgos pa'i gzhung bdun sogs thugs 'dzin mdzad/ ngag dbang phun tshogs don grub/ mkhas grub kun dga' bsod nams/ byams pa nam mkha' 'chi med sogs bsten nas sdom pa gsum dang gsung ngag rin po ches gtsos smin grol rgya mtsho lta bu gsan te thos bsam tshul bzhin mdzad/ dgyes rdor sogs yi dam du ma'i bskyed rdzogs la dbang 'byor pa'i sum ldan rdo rje 'dzin pa chen por gyur te/ mkhas grub ngag dbang dam chos kyi gdan tshab tu khyab bdag rdo rje 'chang gi khri la mnga' gsol te rab byung bsnyen rdzogs/ byang sems cho ga /sngags kyi smin grol sogs sdom pa gsum cha lag dang bcas pas 'os su gyur pa'i gdul bya thams cad yang dag pa'i lam la dkri bar mdzad/ byams pa kun dga' bstan 'dzin/ byams pa dpal ldan bzang po sogs slob ma bzang la mang bar byon/