chos srid lugs bzang gi phrin las rab tu rgyas pas bstan 'gror sman par mdzad pa'i skyes bu dam pa zhig go/
! gdan rabs zhe drug pa mkhan chen byams pa kun dga' bstan 'dzin ni/ rab byung bcu gsum pa'i me sprel lor brang ti mkhas pa'i rigs su 'khrungs/ gzhon nu'i dus nas yon tan du mas brgyan pa/ byis pa'i spyod pa las 'das pa/ e wa~M chos ldan gyi bla brang thar pa rtser pheb/ rgyun gyi bya ba chos spyod nas brtsams te kun tu dgos pa'i gzhung bdun sogs mdo sngags kyi gzhung lugs chen po rnams dka' ba med par thugs su chud/ rdo rje 'chang nam mkha' 'chi med las sdom pa gsum gyi bka' drin nos te thub bstan yongs rdzogs kyi bdag por gyur/ skye ba du mar bcas rang nyes pa'i tshogs kyis ma gos pa'i phyir tshul khrims kyi dri bsung zhim pos gar bzhugs kyi phyogs thams cad khyab pa kun gyis mngon sum du gyur/ yongs 'dzin gyi bla ma nyi shu rtsa lnga las rje btsun sa skya pa'i snyan brgyud kyi gdams pa rgya mtsho lta bur gsan pa rnams kyang tshig don dang phyag len phra mo dag kyang 'khrul med du mkhyen/ dpal kye rdo rje'i bsnyen pa lan gnyis dang / mgon po che chung sogs kyi bsnyen pa mthar phyin par mdzad pas yi dam lhas dngos grub kyi gnang ba dang / chos skyong srung mas phrin las sgrub pa'i mtshan ma mang pos thugs rgyud gtams/ thub dbang gnas brtan bcu drug dang / slob dpon sangs rgyas gnyis pa sogs kyis dgyes pa'i 'dzum zhal bstan/ rje rdo rje 'chang gi chos kyi khri la bgrang bya dgu'i bar du 'chad rtsod rtsom gsum dang / mkhyen brtse nus pa'i phrin las kyis rgyal ba gnyis pa'i bstan pa sngar las kyang rgyas par mdzad/ sde dge chos rgyal chen pos lan gnyis kyi bar du spyan drangs te 'brel tshad don ldan gyi phrin las bskyangs/ chos rgyal chen po la bsnyen par rdzogs pa'i dge slong gi sdom pa stsal/ snga phyir lam 'bras tshogs bshad tshar bcu dang / slob bshad tshar bzhi/ rdo rje phreng ba tshar gnyis sogs chos kyi 'khor lo bar med du bskor/ gsung gi gsang ba 'dzin pa'i thugs sras sa skya bdag chen/ yar klung mchog sprul/ sku dbon rnam gnyis/ thams cad mkhyen pa mkhyen brtse'i dbang po/ 'jam mgon ngag dbang legs grub gnas lnga rig pa'i paN chen khu na shes rab rgyal mtshan/ sa dbang bla chen/ mkhas dbang kun dga' dpal ldan sogs mkhas pa'i gtsug rgyan/ grub pa'i khyu mchog gser phreng lta bu la smin grol gyi bka' drin ji snyed stsal/ dpal ldan sa ngor tshar gsum gyi bstan 'dzin rnams kyi gtsug na sangs rgyas gnyis pa ltar mdzad/ sde dge'i rgyal khab rnams su'ang lugs gnyis kyi khrims snga mu las bzang du song ba sogs 'gro phan rgya chen mdzad/ slar yang e wa~M chos ldan du byon nas bla brang thar pa rtse pa'i dbu 'phang je mthor song ba 'di rje rdo rje 'chang 'di'i sku'i bsod nams las byung ba kun gyis mngon sum du gyur cing / de nas bzung ste dgung grangs gya bdun par sa skyar bka' chos phul la lan grangs 'ga' tsam dang / chab tshan du re zung pheb pa ma gtogs e wa~M rang du bzhugs 'jags kyis bshad sgrub rnam pa gnyis kho nas dus 'da' bar mdzad la/ de nas ljongs 'di'i skye 'gro'i bsod nams de tsam du zad pa dang / zhing khams gzhan gyi gdul byar gzigs