nas dgung grangs gya bdun pa chu khyi lo hor zla dang po'i nang nas sku khams je nyog gi tshul bstan te/ skabs shig sbyor lam rtse mo thob pa'i rtags su lus la srin bu'i rigs med pa dang / sbyor lam bzod pa thob nas ngan song du mi 'gro bar bshad pa dang / gzhan yang sbyor lam de dag thob pa'i rtags su ji 'drar bshad pa yod ces yang yang bka' 'dri stsal bar/ bdag cag gi rdo rje 'chang de nyid kyis mngon rtogs rgyan gyi 'grel pa ldeb re gnyis gzigs rtog phul bas/ de la'ang zh-ib par gzigs pa sogs nan tan lta bur mdzad 'dug pa ni/ sbyor lam de dag gang rung zhig thob par zhal gyis bzhed par nges so/ /lo de'i zla ba gsum pa'i tshes bco lnga la de ring tshes bco lnga yin pas sangs rgyas kyi 'phel gdung zhig kyang gsol dgos tshul gsungs pa ltar phul bas thugs smon dang bcas te gsol nas/ de'i nub mo zhabs skyil krung dang / sku drang por bsrangs/ tshes bcu bdun nyi ma shar tsam na rje rang gi phyag mdzub nam mkhar gtod cing / sku 'khor ba rnams la 'dir ma sdod ces pa'i brda mdzad/ bdag gi 'dren pa dam pas da ni zhi bar gshegs pa lags pas thugs dam gyi rigs la mi lhod par zhu/ zhes lan gsum tsam zhus pas dbu gug tsam zhig mdzad de gzugs sku'i bkod pa dbyings su bsdus so/ /de'i tshe nam mkha' la 'ja' kha dog sna tshogs shar ba sogs ngo mtshar ba'i ltas du ma gsal/ zhag gsum gyi bar du sku'i gzi mdangs rgyun bas legs shing sku sha dkar ba dang / zhal ras kyi ngos su gnyer ma'ang cher med pa'i gzhon sha chags/ zhag gsum 'gro mtshams zhal mdangs glo bur ba de yal nas dbu mdun du cung zad gug pa dang / shangs bug g.yas nas byang sems dmar po nar tsam zhig babs 'dug pas/ slar 'od gsal las zung 'jug gi skur bzhengs te/ dpa' bo dang rnal 'byor ma bsam gyis mi khyab pa ganggA'i klung gi bye ma snyed kyi grangs dang mnyam pa rnams kyis mchod pa'i khyad par sna tshogs pas mchod cing / sangs rgyas dang byang chub sems dpa'i tshogs dpag tu med pa rnams kyis bkra shis pa'i cho ga dang bcas pa'i sgo nas mchog gi grong khyer du gshegs te rdo rje 'dzin pa'i ye shes kyi sku mngon du mdzad par gdon mi za'o/ /zhugs phul ba'i tshe'ang sku las ye shes kyi me rang 'bar du gyur cing / gdung gi dud pa'ang nam mkha' las 'ja' kha dog sna tshogs 'khrigs pa dang bsdongs nas yal song bas kun gyi snying la dad gus spro gsum gyi rba rlabs ches cher g.yos par gyur to/ /rjes kyi dgongs rdzogs rigs spyi bla brang chen mo'i sngar lam dang bstun pa gzabs rgyas kyi tshul du bdag cag gi 'dren mchog nges pa don gyi rdo rje 'chang byams pa kun dga' bstan pa'i rgyal mtshan gyi zhal snga nas mthar phyin par mdzad do/ /'di nyid kyi rnam thar rgyas pa thar rtse rdo rje 'chang gis mdzad pa las rtogs par bya'o//
! gdan rabs zhe bdun pa mkhan chen ngag dbang blo gros bzang po ni/ khang sar mkhan rin po che ngag dbang chos skyong bzang po'i dbon rigs su 'khrungs/ dam pa la gus shing dman la brtse ba'i byang chub sems dpa'i rigs kyi rtags rdzogs/ e wa~M chos ldan du pheb/ zhabs drung gi bslab sbyangs rigs dpyis phyin par mdzad/ byams pa nam mkha' 'chi med/ mkhas grub ngag dbang dam chos/ byams pa bsod