rabs zhe dgu pa byams pa dpal ldan bzang po ni/ gtsang gi char chos grwa dga' ba gdong grags pa'i nye 'dab pad nang zhes par cho rigs mchog tu gyur pa'i brgyud du 'khrungs/ mkhan chen dpal ldan chos skyong gi dbon po rin chen mchog grub kyi sprul sku 'khrul med yin pa ye shes gzigs pa dag gis lung bstan/ ngor e wa~M chos ldan du pheb/ phan bde bla brang du bzhugs nas klog pa thos bsam gyi 'khor los rang lugs kyi gzhung rnams la bslab sbyang mdzad/ byams pa kun dga' bstan 'dzin/ ngag dbang blo gros bzang po/ dpal ldan chos kyi rgyal mtshan sogs dam pa rnams las spyir sdom pa gsum/ bye brag gsung ngag lam 'bras gtso bor gyur pa'i rgyud sde bzhi'i smin grol gyi bka' srol ji snyed yod pa phal cher gsan/ spong ba bsam gtan gyi 'khor los lhag lha bgrang yas kyi bsnyen sgrub tshul bzhin bgyis/ yongs 'dzin paNDi ta'i rgyal tshab tu kun mkhyen e wa~M pa'i gser khri la zhabs pad bkod de/ bya ba chos spyod kyi 'khor lo so byang sngags gsum dang / lam 'bras la sogs pa'i rgyud sde rnams kyi dbang khrid lung bcas kyis skye 'gro phan bde'i lam la bkod/ 'jam mgon ngag dbang legs grub/ kun dga' bstan pa'i blo gros/ 'jam dbyangs mkhyen brtse'i dbang po/ byams pa kun dga' bstan pa'i rgyal mtshan sogs zhal slob khyad 'phags mang du byon/ mus stag mo gling khar sku tshe dang sgrub pa mthar phyin/ sku tshe'i mjug tu rdo rje rnal 'byor mas rjes su bzung ste/ zhing gzhan du gshegs khar bye ru'i them skas btsugs pa dang / mkha' 'gros bsu bar mdzad pa sogs dag snang bsam gyis mi khyab pa shar ba dang / yongs 'dzin paNDi tas lung bstan stsal ba sgo kun nas 'grig cing / rnam thar bla na med pa mnga' ba'i bshes gnyen mchog go/
! gdan rabs lnga bcu pa rnal 'byor 'jam dpal bzang po ni/ rab byung bcu gsum pa'i nang gses sa mo bya'i lor brang ti mkhas pa'i rigs su sku 'khrungs/ sku chung ngu nas theg chen gyi rigs sad pas bskul te e wa~M thar pa rtser pheb/ 'don chog dang / rgyud chung bzhi sogs thugs 'dzin mdzad/ byams pa bsod nams dpal 'byor gyis mkhan po dang / dpal ldan chos kyi rgyal mtshan gyis las slob sogs dad pa'i dge 'dun grangs tshang ba'i dbus su tshigs gsum rim nos kyi bsnyen par rdzogs/ rang nyid kyi gcen byams pa kun dga' bstan 'dzin sogs yongs 'dzin du ma las rgyud sde bzhi dang 'brel ba'i dbang / rjes gnang / rig gtad sogs du ma dang / be'u bum/ bka' 'bum sogs rgya cher gsan/ kye rdor gzhi bsnyen sogs sgrub pa'i rgyal mtshan mthon por bsgrengs/ khyad par gsung ngag rin po che lam 'bras bu dang bcas pa'i gdams ngag gtsos chag med rnam bzhi gsan nas thugs dam gyi mthil mdzad pas zab gsal dbyer med kyi ye shes mngon du gyur/ byams pa dpal ldan bzang po'i gdan tshab tu 'og min e wa~M chos ldan gyi chos khri la mnga' gsol te/ sdom pa gsum dang / dges pa rdo rje'i zab khrid lam 'bras bu dang bcas pa'i gdams ngag sogs gang la gang 'dod kyi smin grol bsam gyis mi khyab pa stsal nas gdul bya rigs can sna tshogs srid pa'i mtsho las bsgral te thar pa'i grong khyer mchog tu dkri ba dang / khyad par gsung las skyes pa'i thugs sras/ mkhan chen byams pa kun dga' bstan pa'i rgyal