ma'ang mkhas shing dngos grub brnyes pa mang du byon cing / de dag las gyes pa'i dngos slob dang nying slob kyi tshogs bgrang du med par byon pas deng sang gi skabs 'dir sa chen po 'di yongs su gang ste/ thams cad kyis kyang bstan pa rin po che phyogs thams cad du spel zhing skye rgu ma lus pa mngon mtho dang nges legs kyi go 'phang mthon por sbyor ba la ched du brtson par lhur bzhes pa sha stag go /khyad par gsung ngag slob bshad kyi bstan pa gtod cing thugs kyi sras su gyur pa ni/ khang sar mkhan chen 'jam pa'i dbyangs ngag dbang bsod nams rgyal mtshan dang / mkhan chen smra ba'i nyi ma 'jam dbyangs shes rab rgya mtsho/ phan khang mkhan rin po che phyir mi ldog pa'i byang chub sems dpa' chen po dpal ldan blo gros rgyal mtshan/ sku'i gnyen du gyur cing sku tshe ril por mnyes pa gsum gyis sri zhu sgrub pa mkhan chen 'jam dbyangs rin chen rdo rje/ smra ba'i khyu mchog chab mdo rgya sprul rin po che 'phags mchog thub bstan 'jigs med chos kyi dbang phyug /kun mkhyen bu ston rin po che'i bstan 'dzin gyi skyes bu ri zur bla ma rin chen blo bzang mkhyen rab/ mnga' ri chos rje snyan brgyud bstan pa'i srog shing kun dga' 'jam dbyangs/ gnas lnga rig pa'i ma hA paNDi ta 'jigs med dpal ldan gtsos snga phyir mkhas pa'i gtsug rgyan/ grub pa'i khyu mchog brgya skor tsam dang / lugs gnyis kyi tha shal ba bdag lta bu'ang skal ba bzang po'i gral mthar tshud pa ste/ de rnams kyi nang nas 'ga' zhig ni bsgoms pas grub 'bras mngon du gyur la/ bstan 'dzin gyi skyes bu rnams kyis ni slob bshad kyi bstan pa nyi ma shar ba ltar gsal bar mdzad do/ /dus de tsam na stod mnga' ri skor gsum/ bar dbus gtsang ru bzhi/ smad mdo khams sgang drug gi sa'i cha thams cad zhal slob kyis gang ba rnams kyis ni e ma bdag cags la sangs rgyas dngos su byon pa lta bu'i zhal gyi bdud rtsi myong ba 'di lta bu ni sngon bcom ldan 'das kyi 'khor lnga sde bzang po dang 'dra bas a la la'o zhes pa'i sgras phyogs kyi khor yug 'gengs pa tsam du gyur to/ /de ltar sku tshe ril por bshad sgrub gnyis kyi sgo nas bstan pa rin po che phyogs thams cad du spel te/ gdul bya rtag 'dzin can rnams chos la bskul ba dang / 'jig rten gyi khams gzhan gyi gdul bar bya ba rnams dus la bab par gzigs nas dgung grangs zhe gnyis bzhes pa lcags rta zla ba dgu pa phyi ma'i tshes bzhi'i nyi dros su bla ma rin chen 'byung ldan gyi stabs su bzhugs te/ dbang bzhi'i brda thun mong ma yin pa rnams mkha' 'gro mar bstan nas gzugs sku'i bkod pa dbyings su bsdus shing / de'i mod la zhal gyi dkyil 'khor sngar las gsal zhing sku lus gzi brjid dang ldan pa sogs bla na med pa'i ye shes kyi bdud rtsi thob pa'i gang zag rnams kyi dbang po yongs su gsal zhing bzhin gyi mdog ni dag la/ pags pa'i mdog ni dkar ba la sogs pa sngar las gnas yongs su 'gyur bar gsungs pa dang tshul mtshungs par gyur to/ /glo bur du char zim bu'i rgyun dang / 'ja' sprin ngo mtshar ba mang po/ khyad par shar phyogs nas mchod rten gyi dbyibs can gyi sprin byung / tshes brgyad kyi snga dror zhib tu mjal ba na shangs bug gnyis nas byang sems dkar po babs pas sku lus thams