[A:9a]ma bskur zhes grags so/ /de nas 'dam des 'dzam bu'i gling du mchod rten bye ba la sogs pa bzhengs/ klu rnams kyis grogs byas te phal cher grub la/ 'ga' zhig klu'i yul du mi 'gro ba'i phyir ma byas zer te/ de na klu sgrub zhes mtshan du grags so/ /klu sgrub kyi skad dod nA gardzu na'i nA ga ni klu ste/ chos dbyings su skyes pa rtag chad gnyis kyi mtha' la mi gnas pa/ gsung rab rin po che'i bang mdzod la mnga' brnyes pa bdag med rtogs pa'i ye shes kyi grub mtha' ngan pa'i bu shing bsreg cing gsal ba'i lta ba dang ldan pas klu'o/ /ar dzu na ni srid sgrub ste/ chos kyi rgyal srid skyong ba dang / nyon mongs pa'i dgra tshogs 'dul bas srid sgrub te klu sgrub bo/ /tshig gsal du/ gang zhig mtha' gnyis gnas la gnas gsal zhing / /rdzogs sangs rgyas blo rgya mtsho skye ba brnyes/ /dam chos mdzod kyi zab mo nyid ji ltar/ /rjes su rtogs shing thugs rjes ston par mdzad/ /gang gi lta ba'i mi dag gis/ /da dung phas rgol gzhung lugs kyi/ /bu shing dang ni 'jig rten gyi/ /yid kyi mun rnams 'joms par mdzad/ /gang gi gnyis med ye shes gsung mda'i tshogs/ /lha dang bcas pa'i gdul bya'i 'jig rten la/ /khams gsum dag tu rgyal thabs legs mdzad pas/ /srid pa'i dgra sde ma lus 'joms mdzad pa/ /klu sgrub de la phyag 'tshal nas ni de'i/ /zhes gsungs so/ /de nas li kha ra shing 'phel du yang gser 'gyur byas te sbyin pa rgya chen po mdzad/ de'i tshe bram ze rgan rgon