[A:18b]gsol ba btab pas/ bud med cig byung ste de ni klu las gyur pa'i rnal 'byor mar grags pa de yin zhing / des khyod rgyal po bi su kalpa yin nam gsungs/ yin zhus pas/ lha khang gi nang du khrid/ dpal gsang ba 'dus pa'i ye shes kyi dkyil 'khor du mngon sum du bcug dbang bskur/ rgyud bshad/ gdams pa dang rjes su bstan pa mtha' dag gnang nas glegs bam gtad/ des kyang de'i don nyams su blangs pas phyag rgya chen po mchog gi dngos grub brnyes so/ /de'i tshe yul ra Da'i bram ze cig la/ sras bzhi yod de/ de rnams gzhon nu'i dus na sgra'i bstan bcos la sogs pa rig pa'i gnas rnams la legs par sbyang nas/ phyis bstan pa la dad par gyur pa dang / de'i nang nas gcig sras sgra gcan 'dzin bzang po las rab tu byung ste/ mtshan yang sgra gcan 'dzin bzang por btags so/ /des phyis mtshan nyid kyi sde snod la legs par sbyangs pas mkhas pa chen por gyur te/ dpal bAe kra ma la shI la'i gtsug lag khang gi mkhan po mdzad de/ bstan pa'i bya ba rgya cher mdzad pa dang / rgyal po bi su kalpa la mkha' 'gro mas gnang ba'i gsang sngags kyi chos yod pa thos pas dad nas/ de'i drung du song ste maNDal sngon du 'gro bas gus pa dang bcas te/ gsol ba btab pas/ des dpal gsang ba 'dus pa'i dkyil 'khor du bcug ste dbang bskur/ rgyud bshad/ gdams pa dang rjes su bstan pa mtha' dag gnang ngo / /des kyang de'i don nyams su blangs pas/ bskyed rdzogs kyi don la bstan pa cung zad thob pa dang / mthar