[A:2b]'dir bcom ldan 'das thub pa'i dbang po 'di nyid kyis bskal pa grangs med pa'i sngon rol nas tshogs gnyis kyi mdzad pa rmad du byung ba du ma zhig gis gdul bya'i don du bsgrubs pa'i 'bras bu ni/ skyon kun zad cing / yon tan kun rdzogs pa'i sangs rgyas nyid yin la/ de'i bstan pa rjod byed lung sde snod gsum dang / brjod bya bslab pa rin po che gsum ni thar 'dod rnams kyi phan bde'i 'jug ngogs kho nar gyur pas/ bshad sgrub kyis 'dzin pa'i skyes chen/ rgya bod du ji ltar byon pa'i tshul ni 'dir bshad par bya ba'i don no/ /'di la drug ston pa sangs rgyas kyi byon tshul/ de'i bka' ji ltar bsdus pa/ bstan 'dzin shing rta'i srol 'byed byon tshul/ srol 'dzin a ti sha'i rnam thar/ de'i rjes su slob pa'i bshes gnyen byon tshul/ de rnams kyis zab pa dang rgya che ba'i bstan bcos ngo mtshar can ji ltar mdzad pa'i tshul bshad pa'o/ /dang po la theg pa mchog dman gyi gdul bya'i dbang gis/ mi 'dra ba'i khyad par mang du gsungs kyang rgyas par ma spros la/ 'dir byang chub sems dpa'i sde snod las gsungs pa'i dbang du byas nas/ dang po thugs bskyed tshul ni/ snying rje pad dkar las/ bram ze rgya mtsho'i rdul du gyur pa'i tshe/ sangs rgyas rin chen snying po'i drung du dang por thugs bskyed par gsungs/ /skal bzang nas/ nga ni sngon tshe dman par gyur pa na/ /de bzhin gshegs pa shAkya thub de la/ /'jam gang zhig ni dbul ba byas nas kyang / /dang po byang chub mchog tu sems bskyed do/ /zhes dang / drin lan bsab pa las/ ston pa sngon las kyi nus pas dmyal bar shing rta 'dren pa'i gyad du 'khrungs pa'i tshe/ zla bo stobs chung ba la