[A:32a]bdun brgya po rnams ma lus par/ /'bol le ka ma la ru sgrol bar bya/ /zhes zer ba dang / gser rnams bton te grur zhugs ma Ni bgrangs pas/ mnyan pa na re/ nged kha ba can gyi thugs rje chen po de/ /ma Ni 'di ltar byed pa yin zer nas bgrangs byung tsa na/ yid 'dzin gyur pas/ the tshom du gyur te/ khyed su yin nam gsung zhig 'byon par zhu byas pas/ gnyan pa na re/ tshe dang ldan pa snga 'grogs kyi dus su spobs pa ma myur/ gzhung 'grogs kyi dus su khrel gzhung ma chung / phyi 'grogs kyi dus su phyi thag ma thung bya ba/ ma nus pa'i dus phan pa dang / dgos dus sleb pa bya ba/ yun du 'grogs pa la dgos pa yin/ rim gyis shes par 'gyur gsungs de ma thag gru sgrol ba dang / da nam phyed du song / dug sbrul dang / chom rkun gyi 'jigs pa 'ong bas/ do nub bi kra ma la'i sgo spe 'og tu nyol gsungs nas gzhan du song / der sleb pa na/ rgya brtson 'grus seng ge sgo khang steng na bzhugs pas gsan te/ khyed rnams gang nas 'ong gsungs/ nged rnams mnga' ris stod nas yin zhus pas/ 'o na sgo ba byis pa cig yod de la khyed rang gi nor rnams chol la der gzims gsungs/ de nas byis pa la gser rnams bcol bas/ blo gtad thub pa grogs kyi mchog bya ba yin/ /khyed rang rnams bag phebs par gzims zer/ nangs par sgo phye ma thag byis pa gzhon nu cig gis bod kyi skad du/ khyed rnams gang nas byon/ lam la 'jigs pa mi 'dug gam zer bas/ nged mnga' ris nas 'ong / lam 'jam par byung /