[A:༣༢ན]བདུན་བརྒྱ་པོ་རྣམས་མ་ལུས་པར། །འབོལ་ལེ་ཀ་མ་ལ་རུ་སྒྲོལ་བར་བྱ། །ཞེས་ཟེར་བ་དང་། གསེར་རྣམས་བཏོན་ཏེ་གྲུར་ཞུགས་མ་ཎི་བགྲངས་པས། མཉན་པ་ན་རེ། ངེད་ཁ་བ་ཅན་གྱི་ཐུགས་རྗེ་ཆེན་པོ་དེ། །མ་ཎི་འདི་ལྟར་བྱེད་པ་ཡིན་ཟེར་ནས་བགྲངས་བྱུང་ཙ་ན། ཡིད་འཛིན་གྱུར་པས། ཐེ་ཚོམ་དུ་གྱུར་ཏེ། ཁྱེད་སུ་ཡིན་ནམ་གསུང་ཞིག་འབྱོན་པར་ཞུ་བྱས་པས། གཉན་པ་ན་རེ། ཚེ་དང་ལྡན་པ་སྔ་འགྲོགས་ཀྱི་དུས་སུ་སྤོབས་པ་མ་མྱུར། གཞུང་འགྲོགས་ཀྱི་དུས་སུ་ཁྲེལ་གཞུང་མ་ཆུང་། ཕྱི་འགྲོགས་ཀྱི་དུས་སུ་ཕྱི་ཐག་མ་ཐུང་བྱ་བ། མ་ནུས་པའི་དུས་ཕན་པ་དང་། དགོས་དུས་སླེབ་པ་བྱ་བ། ཡུན་དུ་འགྲོགས་པ་ལ་དགོས་པ་ཡིན། རིམ་གྱིས་ཤེས་པར་འགྱུར་གསུངས་དེ་མ་ཐག་གྲུ་སྒྲོལ་བ་དང་། ད་ནམ་ཕྱེད་དུ་སོང་། དུག་སྦྲུལ་དང་། ཆོམ་རྐུན་གྱི་འཇིགས་པ་འོང་བས། དོ་ནུབ་བི་ཀྲ་མ་ལའི་སྒོ་སྤེ་འོག་ཏུ་ཉོལ་གསུངས་ནས་གཞན་དུ་སོང་། དེར་སླེབ་པ་ན། རྒྱ་བརྩོན་འགྲུས་སེང་གེ་སྒོ་ཁང་སྟེང་ན་བཞུགས་པས་གསན་ཏེ། ཁྱེད་རྣམས་གང་ནས་འོང་གསུངས། ངེད་རྣམས་མངའ་རིས་སྟོད་ནས་ཡིན་ཞུས་པས། འོ་ན་སྒོ་བ་བྱིས་པ་ཅིག་ཡོད་དེ་ལ་ཁྱེད་རང་གི་ནོར་རྣམས་ཆོལ་ལ་དེར་གཟིམས་གསུངས། དེ་ནས་བྱིས་པ་ལ་གསེར་རྣམས་བཅོལ་བས། བློ་གཏད་ཐུབ་པ་གྲོགས་ཀྱི་མཆོག་བྱ་བ་ཡིན། །ཁྱེད་རང་རྣམས་བག་ཕེབས་པར་གཟིམས་ཟེར། ནངས་པར་སྒོ་ཕྱེ་མ་ཐག བྱིས་པ་གཞོན་ནུ་ཅིག་གིས་བོད་ཀྱི་སྐད་དུ། ཁྱེད་རྣམས་གང་ནས་བྱོན། ལམ་ལ་འཇིགས་པ་མི་འདུག་གམ་ཟེར་བས། ངེད་མངའ་རིས་ནས་འོང་། ལམ་འཇམ་པར་བྱུང་།