[A:42b]las rgyu 'bras par grags te/ kho bo'i ming tsam gyis kyang bstan pa la phan par byas gsungs nas mnyes/ de'i dus bod dbus gtsang gi mkhas pa phal che ba der tshogs te/ lta ba'i gnad la sogs pa bstan pa rin po che las brtsams pa'i dri ba mang du zhus pas/ rang rang gi the tshom gyi dra ba chod par mdzad do/ /de nas lo tsa ba nag tshos/ da ni jo bo bod du lo gcig las mi bzhugs pa'i chad so yod pas/ chos zhu ba rnams zhus shig ces lha btsun pa sogs la bskul bas/ jo bo la lha btsun pas gser srang sum brgya'i me tog dang bcas te/ bod kyi yul 'dir theg pa chen po'i lam la log par rtog pa'i gang zag dge ba'i bshes gnyen gyis ma zin pa dag phan tshun rtsod cing / rang rang gi rtog ges zab pa dang rgya che ba'i don la spyod pa la rtsod cing / so sor mi mthun pa dag mchis pas/ de dag gi the tshom bsal du gsol/ zhes pa dang / gzhan yang theg pa thun mong pa'i dri ba gnyis/ pha rol tu phyin pa'i dri ba gnyis/ gsang sngags la dri ba gsum la sogs pa mang du zhus nas/ byams pa dang / klu sgrub nas brgyud pa'i gdams ngag bla ma nyid kyis thugs nyams su bzhes pa/ tshig nyung la don rgyas pa zhig mdzad par zhu zhus pas mdo sngags gnyis ka'i gnad bsdus nas ston pas/ brjod bya yongs su rdzogs pa dang / sems 'dul ba'i rim pa gtso bor mdzad pa lag tu blang bde ba dang / shing rta chen po gnyis kyi lugs la mkhas pa'i bla ma gnyis kyi gdams pas brgyan pa lugs gzhan las khyad par du 'phags pa/