[A:46a]gangs ri'i khrod du bstan pa snga dar la mkhan chen zhi ba 'tsho/ slob dpon padma sambha ba/ slob dpon ka ma shi la rnams bka' drin ches shin tu che la/ bstan pa phyi dar la/ lta spyod log par smra ba 'ga' zhig shing rta chen po'i gzhung rnams la nyams len gyi gnad med pa'i bshad chos su bsam zhing / nyams len snying po'i don ston pa'i man ngag zur du yod par 'dod pas/ bshad pa dang sgrub pa'i chos don tha dad du 'dzin pa dang / sdom pa gsum 'gal bar bsams nas tshul khrims kyi bslab pa khyad du gsod pa dang / lam phyogs re bas thar pa thob par 'dod pa rnams 'gog pa la/ dpal ldan a ti sha nyid kha ba can pa thams cad la bka' drin che ba yin te/ rgyal ba'i gsung rab thams cad kyi gnad bsdus pa/ shing rta chen po klu sgrub dang / thogs med gnyis kyi lam srol/ rnam pa thams cad mkhyen pa'i sar 'gro ba'i skye bo mchog gi chos lugs/ skyes bu gsum gyi nyams su blang ba'i rim pa ma tshang ba med par bsdus pa byang chub lam gyi sgron me'i sgo nas skal ba dang ldan pa rnams rim gyis sangs rgyas kyi sar khrid pa'i lam ma nor ba gsal bar mdzad pas bka' drin che ba yin no/ /de yang spyir rgyal ba'i lung gi bstan pa thams cad sde snod gsum du 'du bas/ rtogs pa'i bstan pa yang bslab pa gsum du 'du la/ tshul khrims kyi bslab pa ni/ ting nge 'dzin gyi bslab pa sogs yon tan thams cad kyi rten du gsungs shing / ting nge 'dzin dang shes rab kyi bslab pa ni/ byang chub mchog