[A:7]chub sems sbyong jo bo bka' gdams pa'i lugs/ kha che'i pan chen shAkya shrI'i lugs/ rgyud kyi zab bcud dus 'khor ba'i lugs so/
dang po spyir thub pa'i 'das lo ngos gzung ba la/ bltams lo ngos zin dgos pas/ thub pa'i dbang po dus nam gyi tshe byon zhing / lo gang la bltams nas/ nam zhig mya ngan las 'das pa'i tshul bstan snyam na/ chos la 'jug pa'i sgo las/ g.yul brtan 'og tu nyis stong lon// dga' byed 'og tu brgyad brgya ste// zhes sogs dang / yul dbus na dgra ngan gyi sras brgya'i gcen 'thab par dka' ba zhes bya ba bltams pa'i dus su/ rtsod dus kyi 'go bzung ngo/ de'i 'gran zla rgyal po skyabs seng gi sras lnga'i gcen g.yul ngor brtan pa zhes bya bas/ lo bcos nas nyis stong du nye ba'i tshe shAkya thub pa byon no/ zhes pa'i rdo rje'i tshig de nyid bkrol te bshad na/ g.yul ngor brtan pas dgra ngan dpung tshogs bco brgyad bcom pa'i dus ni/ mi rnams tshe lo brgya bco brgyad pa yin la/ de'i dus su bskal pa tsam la dus bzhir phye ba'i rtsod dus kyi 'go brtsams pa yin la/ de nas lo stong dang bdun brgya don dgu lon pa na mi rnams tshe lo brgya pa yin zhing / de nas lo gsum 'das pa'i me mo yos rab byung gi lo'i sa ga zla ba'i nya la lhums su zhugs nas/ rnam byung gi lo sa pho 'brug la sku bltams/ so lnga pa chu pho stag la sangs rgyas/ brgyad cu pa me mo phag la mya ngan las 'da' ba'i tshul bstan pa yin no/
'o na lo de nyid kyi zla ba gang gi tshes pa gang la mya ngan las 'das snyam na/ sa ga zla ba'i tshes bco lnga la 'das pa dang / smin drug zla ba'i tshes brgyad